Тик күз генә тимәсен!

Былтыр апрельдә Уфаның Яшьләр сараенда кечкенәдән сәхнәдә үскән егетләрнең беренче аерым концерты узды. Тамашачы Юнысовларны сәхнәдән җибәрергә теләмичә, концерт хәтта дүрт сәгатькә сузылып китте. Авылларда чыгыш ясаганда да шулай — җибәрмиләр! Әбиләр борчылып ук куя: “Хет эчке киемнәрен тискәре ягы белән кисеннәр иде бу балалар, күз тиюе бар”, — диләр.
Быел да Юнысовлар җыр-моң сөючеләрне яңа программа белән куандырмакчы. Тиздән шул ук Яшьләр сараенда аларның икенче концерты уза. Шоу-программада Башкортстанның халык артисты, баянчы Халит Фатыйхов, җыр­чылар Әнвәр Нургалиев һәм Лиана Габдрахманова, яшь башкаручылар да катнаша. Алып баручысы — Башкортстанның атказанган артисты Мәхмүт Фатыйхов. Җырлы-биюле тамаша булачак. Күп җырларны Юнысовлар үзләре язган.
— Хәләл җефетләрегез дә катнашадыр? — дип кызыксынам егетләрдән, Алмазның актриса хатыны Айгөлгә, Айдарның биюче хатыны Азалиягә ишарәләп.
— Сөеклеләребезнең әлегә эше җитдирәк, алар безгә ярдәм итә, — ди егетләр.
Чынлап та, әзерлек зур көч, җитдилек таләп итә. Айдар белән Алмаз милли моңнарны халыкка тарату идеясе белән янып яши. Яшьләрдә гармун-баян аша үзе­безнең көйләргә мәхәббәт тәр­бияләргә хыялланалар.
Махсус шушы тамаша өчен Казан шәһәре остасыннан яңа тальяннар сатып алынган. Ә “яңа” дип аталган тальяннарга да ун ел икән, тик алар әле уйналмаган, үз ху­җасын көткән. Егетләрнең фи­керенчә, элекке баяннарның сыйфаты яхшырак.
Яңа программаның тагын бер үзенчәлеге — татар курае. “Ул башкорт кураеннан аерыла, — дип аңлата Айдар. — Кыскарак була, каурыйдан, я тимердән эшләнә. Уйнаганда башкорт курае белән флейта бергә кушылган кебек моң ишетелә. Бик матур!”
Татар кураена, гармунның серле моңнарына беркем дә битараф кала алмаячак, дип ышана егетләр. Сынап карыйк!..