-16 °С
Болытлы
Гәзиткә язылуVKOKTikTokINSTAGRAM
Барлык яңалыклар
Әдәбият
16 декабрь 2014, 21:49

“Бу якларга күптән гашыйк мин!”

Илеш районының үзәкләштерелгән китапханәсендә күренекле шагыйрь, публицист һәм җәмәгать эшлеклесе, Русиянең һәм Башкортстанның атказанган мәдәният хезмәткәре, Фатих Кәрим исемендәге премия лауреаты Муса Сираҗига багышланган әдәби-музыкаль кичә үтте. “Илһам” клубы җитәкчесе Клара Хәлиуллина оештырган “Мәңгелек моңым минем” дигән чара Муса Сираҗиның иҗатын үз итүчеләрне җыйды.

Билгеле булуынча, бүген Муса Шәрәфетдин улы Илеш­тә яшәп иҗат итә.
— Бер канатым Туймазы булса, икенчесе — Илеш. Моның үз сәбәпләре бар, — дип чара­ның башында ук бу мәсьәләгә ачык­лык кертте шагыйрь һәм Илеш җире, аның данлы кеше­ләре белән бәйләнеше турында бәян итте: — Өлкән яшьтәгеләр хәтер­лидер, хәтсез еллар элек нефтьчеләр Илеш җирләрен тикшерделәр. Алар арасында ике абыем Сәлим белән Гафур да бар иде. Сәлим абыем — Шидәле, Гафур абыем Бүләк авыллары янындагы җирләрне бораулауда катнашты. Мин дә алар янына кунакка еш килә, килгән саен Илешнең күркәм табигатенә, аның ачык күңелле кешеләренә чын-чынлап гашыйк булып китә идем. Гафур абыем да бу якларны бик ошатты. Ошатып кына калмады, Бүләк авылы сылуын үзенә гомерлек яр итеп сайлады. Шулай килеп чыкты, өлкәнәеп барганда гына мин дә Илеш кияве булып киттем.
Икенчедән, “Кызыл таң” гәзитендә, Башкортстан Язучылар бер­легендә эшләгәндә минем Илеш районы белән мөнәсә­бәтем бик әйбәт булды. Бервакыт 5 язучы белән районга килеп төштек. Бик җылы каршы алдылар, авылларга очрашуга алып бардылар. Иртәгә кайтып китәбез дигән көндә партия район комитетының идеология буенча секретаре Рифкать Фәтхиев: “Берсекөнгә бе­ренче секретарь Тәлгать Рахмановка 60 яшь тула, шул уңай­дан берәр шигырь язалмас­сың­мы?” — дип мө­рәҗәгать итте. Каршы килеп буламыни, төн утырып шигырь язарга туры килде. Ул ярыйсы гына килеп чыккан кебек булды.
Иртәгәсен мин аны иҗат­таш дусларым алдында Тәлгать Рахмановка укыдым. Шигырьне укыр алдыннан: “Коръән Кәрим — “Бисмил­лаһир иррахман ир­рахим”нан, ә Илеш җире Тәлгать Рахманнан башлана”, — дидем. Бу фикер дә, шигырь дә аңа бик ошады. Ул гына да түгел, “Шигыреңне туганнарым, дусларым каршында да укырсың”, — дип, Тәлгать Лотфулла улы мине юбилей чарасына чакырды. Шул вакыттан соң Илешнең данлы кешеләренә багышлап бик күп шигырь, очерк, сурәтләмәләр язылды. Аларның күпләре “Кызыл таң”да басылды, кайберләре “Китап” нәшриятында дөнья күргән китапларыма да кертелде. Менә шулардан соң Илеш җире миңа ничек якын булмасын инде?! — дип тәмамлады чыгышын Муса Сираҗи.
Шагыйрьне иҗат бәйрәме белән котларга бик күп кунак килгән иде. Башкортстан Язучылар берлеге әгъзасы, шагыйрь, Дүртөйленең “Дулкын” әдәби берләшмәсе җитәкчесе Рафаил Хафизов, район китапханәсе каршында эшләп килүче “Илһам” клубы әгъзасы, “Балкыш” әдәби берләшмәсе җитәкчесе, ша­гыйрә Зәлифә Кашапова, Муса Сираҗи очеркы герое, штанга буенча СССР чемпионы Фәвил Гыйльданов, Русия һәм Башкортстан Журналистлар берлеге әгъзасы, ветеран журналист Гөлфинә Сә­лимова, шагыйрьнең сабакташы, мә­гариф ветераны Фәнә Мин­һаҗева, ветеран укытучы Сәрия Сафиуллина шагыйрь­нең үзе, иҗаты турында бик җылы фикерләр әйттеләр, аның белән бәйле хатирәләре белән уртаклаштылар, чыгыш ясау­чыларның кайберләре аңа багышлап язган шигырьләрен дә укыды.
Муса Сираҗи — күпкырлы шәхес: ул оста каләмле публицист та, талантлы шагыйрь дә. Аның шигырьләре гадилеге һәм җиңел телле булуы белән аерылып тора. Шуңа аларны композиторлар да бик теләп көйгә сала. Әлеге кичәдә дә шагыйрь сүзләренә иҗат ителгән байтак җыр яңгырады. Аларны Баш­кортстанның атказанган мә­дәният хез­мәткәр­ләре Рәсилә Басыйрова, Рәсидә Мостафина, үзешчән сәнгать осталары Зифа Фәт­хуллина, Мәүлидә Закирова башкарды. Ә район сәнгать мәктәбе укытучысы Валерий Закиров Муса Шәрәфетдин улына булган теләкләрен гармун моңына төреп җиткерде. Бу кичәдә шагыйрьнең җәмә­гате Рәсилә Басыйрова башкаруында Илешкә һәм аның данлы кешеләренә багышланган “Илешем – йөрәк тибешем” (Данил Хәсәншин көе), “Муса батыр” (Ришат Рәхимов көе) җырлары да яңгырады.
Кичә соңында Муса ага үзенең шигырьләрен укыды. Шуларның берсе аеруча хәтердә уелып калды:

Гомер озынлыгын үлчәгәндә,
Җыерчыклар ни дә, чәч нәрсә?!
Шагыйрь гомере йөрәк
яше белән —
Янып яшәү белән үлчәнә!