-14 °С
Болытлы
Гәзиткә язылуVKOKTelegramЯRus
Барлык яңалыклар
Әдәбият
20 октябрь 2016, 02:00

“Безгә — 45 кенә!”

Танылган җырчы Илгиз Шәкүровның чираттагы концерт программасы шулай аталды.Җыр... Көчле дә ул, асыл, гүзәл, санлы... Аның язмышы – Адәм балаларында. Алар белән бергә яши, яшьни ул, алар белән бергә сөенә, сыкрана... Кешеләргә дөньяның матурлыгын, яктылыгын күреп яшәргә ярдәм итә. Ә асылы – моң аның. Татар телендә башка телләргә тәрҗемә ителми торган ике сүз бар – берсе нәкъ шул “моң”, икенчесе – “җирсү”. Ә инде алар икесе бергә кушылса – җыр ярала. Сугыш афәтләрендә, мосафирлык язмышында, сөргеннәрдә күңел бөтенлеген саклап калырга ярдәм иткән ул, бүген дә хиссезлектән, туң йөрәк булудан коткара. Аның халык күңеленә юл таба алуы җырчылардан тора.

Мишкә районы үзәгендә яшәүче Илгиз Шәкүров район хакимияте башлыгы ярдәм­чесе булып эшли. Моннан тыш, ул — төбәктәге татар хәрәкәтен җитәкләү­челәрнең берсе, “Әнисә” мәчетендә “Атнакич” түгәрәген алып бара, “Әс-Сәлам” гәзитен чыгаруда катнаша, туган авылы Бабайда үткән зур чараларга сценарийлар яза, аларны алып бара, җырлый, клип­лар төшерә, тавышы радио-телевидениедә яң­гырап тора, район үзәгендә зур, матур йорт салып кереп, хәләле белән ике бала үстерә... Болар әле күзгә күренеп торганнары гына, гамәлләре күп Илгиз Сәхил улының.

Мишкәгә концерт белән килгән артистларның күбесе аның яр­дәменә таяна. Ике республикадан да җырчы­лар, бу якларда чыгыш ясарга булса, башта Илгизне эзләп таба. Ә күптән түгел бер төркем җырчы аның туган көне – 45 яшенә багышланган кичәгә җыел­ды. Мәдәният йортында узган әлеге чара район тормышында күренекле вакыйгага әверелде. Башкорт­станның атказанган артистлары Фәрвәз Урманшин, Ришат Галиханов, Резеда Әминева, популяр җыр­чылар Зарема Әюпова, Флера Шәрипова, Айдар Фәтхетдинов, Венер Каюмов, Гөлшат Арсланова, “Юлдаш” радиосы алып баручысы Филүс Касыймов, башка кунаклар аңа мәртәбә өстәде.

Тамашаны Илгиз Шә­күровның шәхси архивындагы видеоязмалар тезмәсе ачты. Биредә аның егет чагы, өйләнү тарихы, районда башкарган эшләре чагылган, клиплардан өзек­ләргә дә урын бирелгән. Ниһаять, сәхнә ачылды һәм тамашачы алкышлап җырчының үзен каршылады.

Илгиз Шәкүровны миш­кәлеләр райондагы барлык чараларның уртасында күрергә өйрәнгән. Күпләр аның ярдәменә, акыллы киңәшенә таяна. Әмма якташлары аны сәхнәдә күрүне аерым бер дулкынлану белән көтеп ала. Ул башкарган “Сулар булып ага”, “Әнием өчен”, “Балаларга теләгем”, “Әтием” һәм башка бик күп җырлар республика тамашачысына да яхшы таныш. Әмма Мишкә сәхнә­сендә алар башкачарак яң­гырый кебек. Залдагылар Илгизнең һәр хә­рәкәтен, җан тирбәлешен, күз карашын аңлап тора. Монда аны малай чактан башыннан сыйпап, “Үскәч, җырчы булыр­сың әле”, — дип дәртлән­дергән апалар, аның белән бергә таганда атынып, Бөредә балык каптырып үскән яшьтәшләре, дөнья йөген бергә тарткан фикердәш­ләре, кордашлары... Алар өчен күңеле ачык Илгизнең, аның үзенә дә шундый ук мөнәсәбәт.

Бу концертында Илгиз үз тамашачысын яңа җыр­лар белән шатландырды. “Тормыш шулай”, “Бәхет”, “Безгә 45 кенә”, “Сакла якыннарымны”, “Рәхмәт булып җырым барсын” кебек әсәрләр залдагы­ларның күңеленә хуш килде. Моңа кадәр билгеле җырларны тамашачы да рәхәтләнеп җырлап утырды, сәхнә белән тамаша залы бер дулкында тибрәл­де. Шулай булмый мөмкин түгел, чөнки җырчы аларның халыкка якыннарын сайлый, “мөгез чыгару”, шаккаттыру — аның өчен ят күренеш.

Ә менә хатыны Гүзәл белән аларның уртак сөю җимешләре – балаларына халык шаккатты. Кызлары Самира искиткеч матур бии. Бу кечкенә фәрештә сәхнәгә тияр-тимәс очып йөри кебек. Ә күзләре — ике ут!

Саматның тавышы сәхнәләрдә ин­де күптән яң­гырый, ул “Туган тел”, “Юлдаш” каналларын тың­лаучы­ларга да таныш. Әтисенең Уфадагы концертында башкала тамаша­чысының күңелен яулады. Бу концертта да ул әтисенә кушылып та, ялгызы да җырлар башкарды, алкышларга, чәчкәләргә күмелде. Сүз дә юк, аның киләчәге өметле. Үзе — мәктәптә уку алдынгысы, өйдә әти-әнисенең ярдәмчесе, иң мөһиме, иманлы, тәү­фыйклы бала. Балаларына соклангыч тәрбия бирә Шәкүров­лар. Гомумән, бу гаиләдә туганнар арасындагы якынлык, бер-берсенә булган ихтирам сокландыра.

“Безгә 45 кенә” дип атал­ган чагу тамашага республика сәхнәләреннән төшми иҗат иткән җырчылар җыелды. Аларның һәрбер­сенең карьерасы тауга менгән, яңа үрләр яулаган чоры. Бер сәхнәдә бу кадәр талант ияләрен бергә күрү миш­кәлеләргә Илгизнең зур бүләге булды, әлбәттә. Бу хакта район хакимияте башлыгы Рөстәм Мусин да билгеләп үтте:

— Илгиз Сәхил улы хакимияттә җитди эш башкара, аның тырышлыгы белән район мобилизация эше буенча республикада алдынгылардан санала. Иҗатта да тынгы белмәс кеше ул. Башкаладан еракта яшәсә дә, әледән-әле клиплар төшереп, җырлар яздырып, халыкны сокландыра. Ә аның концерты һәрвакыт йолдызлар парадын хәтер­ләтә. Шуңа да ихтирамга лаек ул.

— Аллага шөкер, туган районым тормышында кайнап яшим, — ди Илгиз. — Башкарган вазыйфаларым бик жаваплы булуына карамастан, төбәктә үткәрел­гән чаралар: сайлау, сабантуй, дини бәйрәмнәр оештырумы — берсеннән дә читтә калганым юк. Район татарлары кон­грессының җаваплы сәркә­тибемен. Телебезне, динебезне, мә­дә­ниятебезне, гореф-га­дәтләребезне, тарихыбызны саклауда, үстерүдә бик күп эшләр башкарыла. Бул­мышымның күп өлешен җыр били.

Халкыбыз элек-электән җырсыз яшәмәгән. Мәхәббәт хисләрен, бәхетен-шатлыгын, югалту кайгысын, хәтта нәфрәтен дә җырга салган ул. Ямансу, кайгылы җырлар жырларга сәбәпләр булмасын. Җыр­ларның күңел­лесе көннәребезне нурландырсын. Иң мөһиме — дөньялар тыныч, имин булсын! Балалар әти-әниле булып үссен. Аларның шат тавышлары дөнья­бызны ямьләсен. Аналарның кайгылы яше таммасын. Алмадай гомерләр вакытсыз өзелмәсен.

Гадәттә, мондый кичә­ләр­не үткәргән иҗат кешеләре турында “якташлары алдында имтихан тотты”, диләр. Бу очракта имтихан булмады ул, дөнья ямен бердәй күрүче, аның тәмен бердәй тоючы җан кардәшләр очрашуы булды. Илгиз фәкать үз көче белән оештырып, гөрләтеп үткәр­де бу тамашаны. Аның алдыннан йокысыз төннәр, борчылулар, мәшәкатьләр, барысы да онытылды. Зал тутырып килгән тамашачы, дуслар ихтирамы, иң мөһиме – дәррәү алкышлар барысын да оныттырды. Күңелдә бер яктылык, илһам нуры калды.
Читайте нас в