+24 °С
Яңгыр
Әдәбият
22 октябрь 2019, 03:55
“Аякларым юлда, күңелем җырда, Җирдә мин бер шундый юламан”
Башкортстанның халык шагыйре Мостай Кәримнең 100 еллыгына багышланган тантаналар Уфада да, әдипнең туган төяге – Чишмә районында да киң колач белән үтте
Башкортстанның халык шагыйре Мостай Кәримнең 100 еллыгына багышланган тантаналар Уфада да, әдипнең туган төяге – Чишмә районында да киң колач белән үтте
Русия Хөкүмәте Рәисе күрсәтмәсе һәм республикабыз Башлыгы указына ярашлы, данлы каләм остасының юбилей чаралары федераль дәрәҗәдә үтте. Аларның йомгаклау өлеше җомга-якшәмбе көннәрендә Уфада һәм Чишмә районының Келәш авылында булды.
Бәйрәмгә килгән кунаклар 18 октябрьдә Башкорт дәүләт университетында Мостай Кәримгә мемориаль тактаташ ачу тантанасында катнашты. Анда Дәүләт җыелышы-Корылтай Рәисе урынбасары Эльвира Аеткулова, Мостай Кәримнең кызы Әлфия, оныгы Тимербулат та бар иде.
Арытаба кунаклар университет эченә керде, һәр катта аларны төрле милләтләр киемендәге студентлар җыр-моң белән каршы алды. Биредә үк халык шагыйре китапларыннан күргәзмә дә оештырылган иде. Мостай Кәрим исемендәге иҗат остаханәсендә аның шигырьләре яңгырады. Укуда, фәнни һәм җәмәгать эшчәнлегендә зур уңышларга ирешкән студентларга биредә үк Мостай Кәрим исемендәге фонд дипломнары тапшырылды.
Халык шагыйренең бер гасырлык юбилее чаралары кысаларында Мостай Кәрим исемендәге Милли яшьләр театры фойесында илебезнең данлыклы мәдәният, җәмәгать һәм сәясәт эшлеклеләре — җырчы, СССРның халык артисты Иосиф Кобзон һәм язучы, публицист, шагыйрь Андрей Дементьев истәлегенә мемориаль тактаташлар ачылды. Биредә аларның исемнәрен мәңгеләштерү очраклы түгел. Бу шәхесләр ике ел элек “Безнең өйнең яме” спектаклен карарга килде, зал тулы тамашачылар арасында И. Кобзон репертуарындагы иң популяр җырларны башкарды, А. Дементьев шигырьләрен сөйләде.
Мостай Кәримнең Профсоюзлар йорты алдындагы һәйкәленә чәчәкләр салу тантанасында республика Башлыгы Радий Хәбиров та катнашты. Чыгышында ул болай диде:
Биредәге тантанага җыелучылар алдында, шулай ук, Федерация Советы Рәисе урынбасары Ильяс Умаханов, Русия Президенты киңәшчесе Владимир Толстой, Казахстанның Дәүләт секретаре Крымбәк Күшәрбаев, Русия Язучылар берлегенең беренче секретаре Геннадий Иванов, Дагстан һәм Кабарда-Балкар язучылар оешмалары җитәкчеләре Магомед Әхмәдов һәм Муталип Беппаев, Кыргызстанның Русиядәге Илчесе Алибәк Джекшенкулов, Татарстан Хөкүмәте Премьер-министры урынбасары Вәсил Шәйхразиев, Татарстанның халык шагыйре Ренат Харис, Мостай Кәримнең кызы, аның исемендәге фондны оештыручы Әлфия Кәримова чыгыш ясадылар. Сенатор Лилия Гомәрова Русия мәдәният министры Владимир Мединскийның тәбрикләвен укып ишеттерде.
Һәйкәл алдында, шулай ук, Мостай Кәримнең шигырьләре яңгырап торды.
Шул ук көнне Башкортстан Башлыгы Радий Хәбиров халык шагыйренең юбилеена килгән берничә күренекле шәхес — Федерация Советы Рәисе урынбасары Ильяс Умаханов, Казахстанның Дәүләт секретаре Крымбәк Күшәрбаев, Кыргызстанның Русиядәге Илчесе Алибәк Джекшенкулов һәм Русия Президентының мәдәният буенча киңәшчесе Владимир Толстой белән эшлекле сөйләшү үткәрде. Әңгәмә барышында кунаклар бәйрәм чараларының югары дәрәҗәдә үтүен билгеләде.
“Торатау” Конгресс-холлында Мостай Кәримнең 100 еллыгына багышланган тантаналы кичәдә Башкортстан Башлыгы Радий Хәбиров катнашты. Чараны Русия Президенты киңәшчесе Владимир Толстой ачты һәм Президент Владимир Путинның юбилей уңаеннан котлавын укып ишеттерде. Сәхнәдән, шулай ук, Русиянең Федерация Советы Рәисе Валентина Матвиенко, Казахстан Президенты Касыйм-Жомарт Токаев котлаулары да яңгырады. Тамашачыларга “Мастерская” кинокомпаниясе төшергән “Мостай” документаль фильмы да күрсәтелде. Бер үк вакытта “Родина” кинотеатрының ике залында да Мостай Кәрим повестена нигезләнеп эшләнгән “Өч таган отряды” фильмы тамашачыларга тәкъдим ителде.
Бәйрәмдә катнашучылар 20 октябрьдә Мостай Кәримнең туган төяге – Чишмә районының Келәш авылына килде. Бу көнне биредә яңа мәдәният йорты ачылды. Мәктәп ихатасында, шулай ук, тантаналы шартларда истәлеккә агачлар утыртылды. Республика Башлыгы Хакимияте җитәкчесе Александр Сидякин, Хөкүмәт вице-премьеры вазыйфасын башкаручы Ленара Иванова юбилей чараларының җылы, ихлас шартларда үтүен билгеләделәр.
Юбилей чаралары халык шагыйренең туган авылына якын урнашкан Кызлар тавы итәгендә тәмамланды. Биредә авылдашлар очрашты, Мостай Кәрим әсәрләре буенча театрлаштырылган тамашалардан өзекләр күрсәтелде.
Фәрит Фаткуллин.
