Күңелебез көзгесендә ниләр чагыла икән?

Әйткәндәй, җыентыкка җиде автор әсәрләре кергән: Миләүшә Гыйльманова, Айдар Маннанов, Ганс Хәкимов, Халисә Рәйхан шигырьләре, Мәрьям Шәмсиева һәм Дилә Мөхәррәм-Хәйретдинова хикәяләре һәм Эльмира Ибраһимова пьесалары. Төрле жанрдагы әсәрләрнең бергә туплануы китапның укучылары күп булачагына өмет уята.

Чарада һәр авторга сүз бирелде. Алар китапны чыграуда катнашкан һәркемгә ихлас рәхмәтләрен җиткерде, иҗатка килгән юллары хакында бәян итте. Шагыйрьләрнең сүзләренә җырлар яңгырады. Аларны Линат Гәрәев, Миләүшә Имашева башкардылар, Денис Мофаззалов очрашуны баян моңнары белән бизәде.

“Китап” нәшриятының баш мөхәррире Зөлфия Карабаева һәм нәфис әдәбият бүлеге җитәкчесе Эльвира Якупова авторларны тәбрикләп, яңа җыентыкка хәерле юл, укучыларының күп булуын теләде. Алар бүген милли әдәбиятка яшьләрне җәлеп итү мөһимлеген дә билгеләп китте. “Сез хәзер бертугандай якынайдыгыз, чөнки иҗатыгыз бер китапта урын алды”, — диде Зөлфия Шәрифҗан кызы “Күңел көзгеләре” авторларына.

Китап туйлаучыларны Башкортстан Язучылар берлегенең татар әдипләре берләшмәсе җитәкчесе Руслан Сөләйманов, язучылар — “Тулпар” журналы хезмәткәрләре Илдус Фазлетдинов, Дилбәр Булатова, Мөнир Вафин, Русия педагогы, профессор Раил Әсәдуллин һәм башкалар котлап, җылы чыгыш ясады
.
Бәйрәмне бик матур итеп Зәлия Ахунова алып барды. Ул авторларга һәм “Китап” нәшрияты хезмәткәрләренә Бөтендөнья татар конгрессының Рәхмәт хатларын да тапшырды.

Әйе, “Китап” нәшриятының Уфаның Ленин урамында урнашкан яңа кибете кыска вакыт эчендә матур, эчтәлекле чаралар үткәрү мәйданчыгына әйләнде. Бүген, кызганычка каршы, яшь буында басма сүзгә кызыксыну азаеп барган заманда, бу сөенечле хәл, дияргә кирәк.
Әлбәттә, һәр иҗат итүченең үз әсәрләрен аерым китап итеп күрәсе килә. Ләкин бүген гади булмаган вакытта яшәвебезне искә алганда, берничә авторга бер җыентык нәшер ителү дә шатландыра. Бүген Халисә Рәйхан әйткәндәй, “Бәлеш булмаганда икмәк ашап хушланасың”. Киләчәктә аерым иҗади “бәлешләр”не дә тәмләргә язсын, дип телисе кала.

Автор фотолары.