Мәскәү елмаюга ышана!

Сентябрьдә Мәскәүдә I Бөтендөнья иҗтимагый ассамблеясе һәм Бөтендөнья язучылар оешмасының II конгрессы узды, анда дөньяның 150дән артык иленнән 4000нән артык делегат катнашты. Шуларның берсе — Башкортстанның халык язучысы Марсель Сәлимов.

Зур форум алдыннан Русия Язучылар берлегенең Шолохов залында Мар. Сәлимнең иҗат кичәсе булды. Чара “Һәнәк” журналының 100 еллыгына багышланды. Марсель Шәйнур улы юмористик басмада 40 елга якын эшли, шуның 30 елында – баш мөхәррир (1980-2010). Ул үзенең иҗади тормышындагы көлкеле очраклар турында сөйләде, иң яхшы совет һәм Русия сатирик басмасы белән җитәкчелек итүнең күпьеллык тәҗ­рибәсе белән уртаклашты, танылган башкорт кинорежиссеры Радик Кил­мәмәтовның “Со смехом по всему свету” дигән яңа документаль фильмын анонслады.
Кичәдә чыгыш ясаган Евразия иҗат гильдиясе рәисе урынбасары Марат Әхмәт­җанов, легендар сатирикның иҗатын югары бәяләп, аны Бурабайга (Казахстан) фести­вальгә чакырды, анда фильм­ның премьерасы булачак.

Күңелле очрашуда, шулай ук, Русиянең Язучылар берлеге секретаре, Әдәби тәр­җе­мә советы рәисе, шагыйрь һәм тәрҗемәче Николай Переяслов, Язучылар берлеклә­ренең халыкара берләшмәсе рәисе, язучы һәм киноактер Юрий Коноплянников, язучы һәм журналист Николай Стародымов, Урыс фән һәм сән­гать академиясе президенты, физика-математика фән­нәре докторы, публицист Виктор Никеров, шагыйрь һәм җәмәгать эшлеклесе Елена Светлая һәм башка танылган Русия һәм чит ил язучылары, журналистлар, фән һәм мәдә­ният эшлеклеләре катнашты. Мәскәү башкортла­рының Әни­сә Динмөхәммәтова җитәк­челегендәге “Бүләк” башкорт вокаль ансамбле милли кос­тюмнарда Әлфия Агие­ваның Мар. Сәлим шигыренә язылган җырын башкарды. Кичәне Русия Язучылар бер­легенең әдәби программалар буенча сәркәтибе, шагыйрь, публицист һәм драматург Нина Дьякова алып барды.

“Киңкүләм мәгълүмат чаралары һәм әдәби журналлар: мәгълүмати симулякрдан мәгъ­нәви ориентирга” темасына оештырылган “түгәрәк өстәл”дә Марсель Шәйнур улы үзенең бай тәҗрибәсе белән уртаклашты. Азия Журналистлар берлеге рәисе, модератор Әшрәф Абү Әл-Язид һәм спикерлар “Һәнәк” башкорт сатирик журналы һәм аның мөхәррирләренең эшчәнлеген югары бәяләделәр.
Бөтендөнья язучылар оешмасы икенче Конгрессының йомгаклау пленар утырышында дөньяның 70 иленнән килгән каләм осталарының өч көнлек киеренке эшенә йомгак ясалды.
Бөтендөнья язучылар оешмасы президенты Маргарита Аль, Марсель Сәлимовның уңышлы иҗади эшчәнлеген билгеләп, аңа “Дөнья әдәби­яты үсешенә керткән өлеше өчен” алтын медален тапшырды. Аның белән бергә казах язучысы һәм публицисты, Халыкара халык дипломатиясе берлеге президенты Бахыт Рөстәмов һәм таҗик шагыйре, Дөнья халыклары ассамблея­сенең әдәби советы рәистәше, Бөтендөнья шигърият хәрәкә­тенең милли координаторы Абдукаххор Косим бүләкләнде.

– Бездә еш кына “Мәскәү күз яшьләренә ышанмый” дип әйтәләр, белмим, бәлки, шулай да булгандыр. Ләкин мин төгәл беләм: Мәскәү елмаюларга ышана. Чын дусларның елмаюына. Бу юлы да шулай булды! – дип тәэссоратлары белән уртаклашты Мар. Сәлим.

Борис Иванов.