Мошенникларга өч миллиард сум күчергәнбез

Аның сүзләренчә, узган атнада гына да Башкортстан халкы үз теләге белән мошенникларга 27 млн сум акча күчергән.

"Сез аңлаганча, бу катлаулы акча җыю схемалары махсус хезмәтләр тарафыннан эшләнгән һәм бу акча турыдан-туры ВСУны финанслауга китә. Кешеләр бу хәйләләргә эләкмәсен өчен аларга яхшы итеп аңлатырга кирәк, чөнки күпләр фатирларын сата, кредитлар ала һәм соңыннан бернәрсәсез кала. Халыкка гади саклау схемалары бар һәм беркемгә дә ышанмаска кирәк, дип даими тукып торыгыз. Чөнки куркыныч бик зур, сез моны аңларга тиеш. Кешене эләктерәләр, ул фатирын сата, акча җибәрә һәм бернәрсәсез кала. Шуннан соң мошенник аңа шалтырата, аның белән сөйләшә башлый: "Нәрсә, син бернәрсәсез калдыңмы?" Һәм шуннан соң: «Бар, шартлат яки яндыр, аннары акчаңны кайтарырбыз», - ди һәм шулай дәвам итә. Димәк, бу тагын да тирәнрәк авыр нәтиҗәләргә китерә. Бу бик авыр хәл. Кызганычка каршы, кешеләрнең җинаятькә бару очраклары бар. Бу явызлыкка каршы бөтен дөнья белән көрәшергә кирәк", - диде төбәк Башлыгы.

Башкортстан буенча Эчке эшләр министрлыгы мәгълүматларына караганда, былтыр Башкортстан халкы телефон һәм онлайн-мошенникларга 3 миллиард сумга якын акча күчергән.

"Быел алдау схемасы буенча миллиард ярым сум акча күчерелгән. Бу акча дошман армиясенә ярдәм итүгә китә. Кешеләр акчасыз кала, өметсезлеккә бирелә. Кемдер фатирын сата, кемдер кредитлар җыя. Без кешеләргә ничек аңлатырга белмибез, әмма һәрберсенең аңына барып җитәргә тиешбез. Бүген авыл биләмәләре башлыклары белән республика Эчке эшләр министры урынбасары Евгений Полтавец аралашачак. Ул нинди схемалар барлыгын, кешеләрне ничек алдаганнарын сөйләячәк. Алар кайткач кешеләргә барысын да җиткерсеннәр өчен. Без бу эшне алып барабыз", - диде Радий Хәбиров, «Башинформ» мәгълүмат агентлыгы соравына җавап биреп.

«Вебер», «Диалог» һәм «Диалог Регионы» агентлыклары тикшеренүләре нәтиҗәләре буенча, русиялеләрнең 88 процентына телефон мошенникларыннан шалтыратулар яки смслар килгән, ә аларның 10 проценты махинацияләр нәтиҗәсендә акчасын югалткан.

фото: башинформ