Яңа елда авылга яңа сулыш кирәк

Аграр тармактагы дәүләт рограммаларында югары бурычлар куела. Акча җитәрме?2015 елга аяк бастык. Узган ел илебез өчен җиңел булмады. Көнбатыш дәүләтләр Русиянең икътисади-сәяси куәте, хәрби әзерлеге буенча “кылларын” тарткалап карады. Әмма ни сәбәпледер, Көнбатыш һаман да бүгенге Русиянең узган гасырның туксанынчы елларындагы “упкыннан” күптән чыгуын танырга ашыкмый. Ә бәлки теләмидер дә? Билгеле, кайсы илнең дә куәте, көче хәрби коралга гына бәйле түгел. Үз халкын үзендә җитештергән азык-төлек белән тәэмин итүченең генә тылы ышанычлы була. Ихтимал, Көнбатыш илләре Русиягә каршы санкция кулланганда шуны күз уңында тотып эш иткәннәрдер. Кайчандыр Британия премьер-министры Уинстон Черчилль: “Үз халкының тамагын туйдыруга сәләтсез һәм азык-төлек импортына бәйле ил җитди хәрби дошман була алмый”, дип әйткән. Илебез сугышка әзерләнми. Әмма нәкъ 2014 елда Русиягә карата кулланылган санкцияләр аграр тармак үсешенә яңа сулыш бирде дә. Аграрийлар узган елда ашлыкның тулай җыемын 105 миллион тоннага җиткерде. Яңа Русия тарихында бу — икенче тапкыр яуланган максималь рекорд. Яшелчә-җимеш, кузаклы культураларның аерым сортлары буенча иң яхшы күрсәткечләргә ирешелде.