+14 °С
Болытлы
Гәзиткә язылуVKOKTelegramЯRus
Барлык яңалыклар
Икътисад
9 апрель 2015, 22:07

БәЙлелектән арыну юлында

Илдә импорт продукциясе күләмен киметүгә Башкортстан аграрийлары лаеклы өлеш кертә.Дөнья базарында төп туклану продуктларына ихтыяҗ белән бергә, хаклар да елдан-ел күтәрелә. Шундый шартларда аграр җитештерү мөмкинлекләре зур булган Русия, кызганычка каршы, һаман да глобаль сәүдә челтәрендә үз урынын ныгытып кала алмады. Илебездә соңгы елларда азык-төлек бәйлелеген киметү юнәлешендә дәүләт әһәмиятендәге проектлар, программалар кабул ителүе киеренкелекне бераз киметте. Шул ук вакытта, Русия импортлаган продукция күләмендә ит һәм сөт, шулай ук, яшелчә-җимеш зур урын алып тора.Әлеге язмада илдә терлекчелек тармагын үстерү проблемалары, җитештерүне арттыруда Башкортстанның мөмкинлекләре турында сүз алып барабыз. Республикада тармакны үстерүдә кайсы юнәлешләргә инвестицияләрне күбрәк җәлеп итәргә кирәк? Башкортстанның аграр тармагы заман таләпләрен ни дәрәҗәдә тоя? Дәүләт җыелышы-Корылтайның комитет рәисе, “Кызыл таң” гәзитенең аграр мәсьәләләр буенча эксперты, профессор Рәсүл Госманов — редакциябез кунагы.

— Рәсүл Үзбәкович, Сез җитәк­челек иткән комитет депутат­ларының шәһәрнең генә түгел, район һәм авылдагы сәүдә нокта­ларын­дагы хәл белән дә еш кына якыннан танышуы мәгълүм. Шундый “рейд”­лардан соңгы сезнең фикерләр сатып алучыларныкына туры киләме, ягъни соңгы вакытта сәүдәдә импорт күләме кимедеме?

— Әлбәттә. Һәм моның сәбәбе дәүләт чикләре аша илебезгә импорт кертүне киметү белән генә аңлатылмый. Мәгълүм булуынча, илебездә 2013-20 елларга кадәр авыл хуҗалыгын үстерү программасы кабул ителгән иде. Әлеге аграр документның АКШ һәм Евросоюз тарафыннан Русиягә карата икътисади һәм сәяси санкцияләр башланганчы ук кабул ителүен истән чыгармыйк. Үзебезнең азык-төлек бәйсезлеген тәэмин итү һәм чит ил продукциясен үзебезнекенә алыштыру максатында бу программага төзәтмәләр кертелде. 2020 елга кадәр илнең сәүдә базарында үзебезнең ит һәм ит продуктлары өлеше гомум күләмдә — 88,3, сөт һәм сөт продукцияләре 90,2 процентка кадәр тәшкил итәргә тиеш. Игътибар итегез: узган елның 4нче кварталында, аннан бер ел элекке чор белән чагыштырганда, чит илдән кертелгән сөт күләме 40,9 процентка кимеде, ит продукциясен импортлау 53 процентка азрак тәшкил итте. Болар — рәсми статистика. Димәк, моңа кадәр чит илдән сатып алынган ризыкларны үзебезнеке алыштырган дигән сүз. Русиядә терлекчелек тарма­гының үсеш юлына басуын күрсәтә бу чагыштыру. Әйткәндәй, узган елда илдә 30,5 миллион тонна сөт җитештерелде. Яңа Русия тарихында беркайчан да мондый биеклеккә күтәрелгәнебез булмаган иде.
Читайте нас в