+24 °С
Болытлы
Гәзиткә язылуVKOKTelegram
Барлык яңалыклар
Икътисад
19 сентябрь 2015, 21:11

Кичәге сүз бүгенгә ярыймы?

Илнең Икътисади үсеш министрлыгы бер ай элек ел ахырына хәлнең тотрыклануын фаразласа, хәзер моның киресен белдерә.“Без” рубрикасындагы язмаларның берсендә илнең Икътисади үсеш министрлыгы һәм аның җитәкчесе Алексей Улюкаев фаразларына нигезләнеп, инде агымдагы елның дүртенче кварталында ук дөньякүләм финанс көрчегенә бәйле Русия икътисадында хәл тотрыклана башлаячагы, 2016 елда исә сизелерлек үсешкә чыгачагы турында бәян иткән идек. Кызганычка каршы, әлеге фаразлар тормышка ашмаска охшаган. Һәрхәлдә, шушы ук ведомство бүген Русия икътисадында андый ук тиз үсеш булмачаягы турында белдерә.

Шушы көннәрдә илнең Икътисади үсеш министрлыгы Хөкүмәт тикшерүенә 2018 елга кадәр ил икътисады үсешенең яңа фаразын кертте. Анда билге­ләнүенчә, элекке фараздан аермалы буларак, доллар һәм нефть бәяләренең дөнья базарында тотрыклануы түгел, тәүгесенең ел ахырына 70 сумга җитүе, икенчесенең исә бер барреле 38 долларга кадәр төшүе көтелә.
Илнең эчке тулай продуктында да 0,9 процент үсешкә, уйланылганча, агымдагы елда түгел, 2016 елда гына чыгачакбыз. Моның белән бергә ил халкы керемнәре, сәнәгать җитештерүе һәм ваклап сату үсешенең туктап калуы фаразлана.
Моңа кадәр Икътисади үсеш министрлыгы ел ахырына илдә инфляция дәрәҗәсе 12-12,4 процент булачак, дип фаразласа, әлеге күрсәткеч тә бу санда тукталып калмаска охшаган. Росстат белдерүенчә, 9 сентябрьгә үк илдә бәяләр ел башыннан 10 процентка үскән. Шуннан чыгып, Икътисади үсеш министрлыгы еллык инфляция дәрәҗәсе 15,6 проценттан да ким булмаячак, дип белдерә.
Кыскасы, “2016-18 елларга Русия Федерациясенең социаль-икътисади үсеше фаразының төп параметрлары турында” документ аның 19 августта Хөкүмәткә кертелгән тәүге вариан­тыннан күпкә күңелсезрәк булып чыкты. Мәгълүм булуынча, тәүге документта 2015-16 елларда дөнья базарында нефть бәясе 50 доллар, 2017 елда — 55, 2018 елда 60 доллар күләмендә булачак, дип фаразланган иде.
Читайте нас: