+21 °С
Болытлы
Икътисад
10 август 2020, 15:55
Сибайны "Салават Юлаев" бизәячәк
Сибайда урамнарны яктылык дизайны элементлары белән бизәү дәвам итә.
Сибайда урамнарны яктылык дизайны элементлары белән бизәү дәвам итә.
Биналарны архитектур яктан яктыртудан тыш, Торак пунктларның эстетикасы елында муниципалитет урамнарны заманча элементларны кулланып бизәү буенча башка эшләр дә алып бара.
7-8 августта Җиңү паркында һәм Таучылар проспектында шәһәр халкын күңелле сюрпризлар көтте – урам утлары белән бергә агачларда гирляндалар да балкыды.
Хәзер 53 агач светодиод җепләр белән үрелгән – һәркайсында 100әр метр. Мондый гирляндалар түбән температурада да ышанычлы эшли, яңгыр һәм кардан курыкмыйлар, озак хезмәт итәләр. Димәк, алар сибайлыларны ел әйләнәсе матурлыклары белән сөендерәчәк.
Хәвефсезлек һәм тотрыклы эш гарантиясе булып түбән җылылык бирү һәм гирляндаларның абсолют герметиклыгы, тузан һәм дым саклау дәрәҗәсе тора.
Урам декорының тагын бер юнәлеше - флеш-неон кулланып яктыртыла торган арт-объектлар урнаштыру. Аларның беренчесе - «Җиде кыз» композициясе - 8 августта Таучылар проспектында куелган иде. Шәһәр халкы урамнарның яңа бизәлешен лаеклы бәяләде, бу хакта фотографияләр, «лайк»лар һәм социаль челтәрләрдәге рәхмәтле фикерләр сөйли.
Сибай халкы һәм кунаклары өчен күңелле сюрпризлар моның белән генә бетми әле. 19 августта шәһәр 65 еллыгын билгеләп үтәчәк. Бу көнне аның урамнарында тагын 5 яктыртучы композиция барлыкка киләчәк. Аларның һәркайсының идеясе җентекләп уйланылган. Чайковский урамы буенча урнашкан йорт янында - «Гаилә» композициясе, Ленин урамында аллеяләрне «Шахтер» һәм «Төзүче» бизәячәк. «Медицина хезмәткәрләре» композициясен Үзәк шәһәр дәваханәсе каршында урнаштырачаклар. Шәһәр үзәген «Салават Юлаев» арт-объекты бизәячәк, ул төп мәйдан янында урнашачак.
Шәһәрнең юбилей көненә 6 йорт фасадларында Сибай турында яхшы сүзләр язылган һәм милли орнамент элементлары белән яктыртылган неон язулары барлыкка киләчәк. Аларны монтажлау инде төгәлләнеп килә. Урам декорының яңа яктылык элементларын урнаштыруга шәһәр бюджетыннан 1,2 миллион сум бүленгән.
Шәһәрне бизәү эшен подрядчы оешмалар гына алып бармый. Гирляндаларны агач кәүсәләренә урнаштырырга шәһәрнең спорт комитеты рәисе оештырган әйдәп баручы спортчылар командасы ярдәм итте, арт-объектлар өстендә Мәдәният һәм ял үзәге һәм «Технотерра» балалар технопаркы хезмәткәрләре эшли. Уртак хезмәт нәтиҗәсендә Сибай урамнары күзгә күренеп үзгәрә.
Фото: башинформ
