Мәскәү өлкәсе Башкортстан тәҗрибәсен өйрәнә

Мәскәү өлкәсе авыл хуҗалыгы министры вазыйфасын башкаручы Сергей Воскресенский җитәкчелегендәге делегация республикага “Башкортстан продуктлары” проектын гамәлгә ашыру тәҗрибәсен өйрәнү өчен килде.

- Бүгенге көндә үз продукциясен маркировкалау хокукына 510 предприятие ия булды, алар 17 мең төрдән артык продукция җитештерә, - дип хәбәр итте республика сәүдә һәм хезмәт күрсәтү министры Алексей Гусев.

Мәскәүдән килгән делегацияне проектка керү этаплары һәм үзенчәлекләре, продукциянең сыйфатын бәяләү методологиясе белән таныштырдылар.

Проектның төп бурычы – урындагы табигый чималдан җитештерелгән продукцияне популярлаштыру, республика җитештерүчеләрен эчке һәм тышкы базарларда алга җибәрүгә ярдәм итү. Коллегалар шулай ук үз продукциясен ритейл киштәләренә чыгару тәҗрибәсе белән уртаклашты.

- Продукциябезне алга җибәрү юнәлешендә куллана торган алымнарның берсе - сәүдә челтәрләре вәкилләрен турыдан-туры предприятиегә алып киләбез, анда алар җитештерүнең барлык этапларын үз күзләре белән күзәтә ала - бик нәтиҗәле ысул, - дип сөйләде Мәскәү өлкәсе авыл хуҗалыгы министры урынбасары Кирилл Григорьев.

Алексей Гусев Башкортстанда кулланыла торган механизмнар турында сөйләде. Аерым алганда, мәгариф, маркетинг, реклама чаралары, шул исәптән сәүдә-сатып алу конференцияләре, “Сәүдә мәктәбе” укыту семинарлары, күргәзмәләр, ярминкәләр, онлайн-презентацияләр.

Фото: pravitelstvorb.ru