Владимир Тощенко: “Төбәкнең зур мөмкинлекләрен тоябыз”

Форум барышында Башкортстан Республикасы Премьер-министры Андрей Назаров “Арктик Пауэр Кэпитал”ның гамәлгә ашыручысы Владимир Тощенко белән очрашты.

Андрей Геннадьевич билгеләвенчә, Сибай инфраструктурасы әлегә башкаладан калыша, әмма Хөкүмәт тарафыннан барлык кирәкле шартларны булдыру, шул исәптән киңкүләм чаралар уздыру өчен зур, системалы эш алып барыла, анда иң мөһиме — инвесторлар белән эш республикага һәм Урал аръягына мөһим нәтиҗә китерәчәк.

"Инвестсабантуйны үткәреп, без чаралар оештыру өчен генә түгел, ә кешеләр тормышы һәм эшкуарлык эшчәнлеге өчен дә инфраструктураны яхшыртабыз", - дип ассызыклады Андрей Назаров.

Премьер-министр фикеренчә, Урал аръягында стратегик уйлаучы һәр бизнесмен һәм инвестор өчен өстәмә мөмкинлекләр бар.

«Әлегә бу территория бәяләнеп бетмәгән, әмма инфраструктура үсә. Аерым алганда, Сибай-Сара тимер юлы төзелеше планлаштырыла. Бу — Казахстанга да руда җибәрергә мөмкинлек бирәчәк тагын бер юнәлеш. Тимер юл тармагы бөтен илгә кирәк, аерым алганда, Сибайга ул ятмаларны эшкәртү, логистиканы яхшырту һәм арзанайту мөмкинлеге бирәчәк. Без инвестицион климатны шул рәвешле формалаштырабыз, ул Русиядә иң яхшылардан саналырга тиеш. Бүгенге көндә стратегик инициативалар агентлыгының инвестицион рейтингында бишенче урында торабыз. Ышанам ки, без бу нәтиҗәне яхшырта алабыз», - дип белдерде Андрей Назаров.

Шулай ук Андрей Геннадьевич күптән түгел Русия Президенты Владимир Путинның «Цемекс» заводы ачылышына сәфәре турында искә төшерде.

“Бу Австрия бизнесменының башта Уфада җитештерү булдыруының, мөмкинлекләрен бәяләүнең һәм республикада үз бизнесын үстерүне дәвам итүенең бер мисалы", - дип өстәде Башкортстан Премьер-министры һәм “Арктик Пауэр Кэпитал” компаниясенең төбәк белән озак елларга партнер булачагына ышаныч белдерде.

«Без республиканың һәм Сибайның зур мөмкинлеген тоябыз, сезнең белән бергә үсәргә телибез. Безнең уртак проектлар өчен кирәк булган инвестицияләрне, беренче чиратта, энергетика өлкәсендә, эшләргә әзербез. Төбәккә һәм монда яшәүче кешеләргә файда китерербез дип өметләнәбез», - дип белдерде үз чиратында Владимир Тощенко.Шулай ук Сергей Клюев белдергәнчә, компания уртак эш кысаларында Башкортостан Республикасы вәкилләре белән энергетика проектлары буенча фикер алыша башлаган инде.