Киләчәк яхшырак булырмы?

Бу хакта Башкортстан Хөкүмәте Премьер-министрының беренче урынбасары, икътисади үсеш һәм инвестиция сәясәте министры Рөстәм Моратов Башкортстан Дәүләт җыелышы-Корылтай Президиумы утырышында белдерде.

— Республика социаль-икътисади үсешенең макроикътисади фаразы өч вариантта эшләнгән: "база", "максатчан" һәм "консерватив". Аларны эшләү Русия Федерациясе Хөкүмәте тарафыннан хупланган гомум икътисади шартлардан һәм тенденцияләрдән чыгып, илдәге һәм дөньядагы эпидемиологик хәл белән бәйле чикләнгән чаралар фонында безнең республика өчен үзенчәлекле булган тенденцияләрдән чыгып башкарылды. Башкортстанда инвестицион кертемнәр туплану фаразлана. Төп капиталга инвестицияләр күләменең үсеш темплары 2022 елда финанслауның барлык чыганаклары исәбенә 109,8 процент тәшкил итәчәк, 2024 елда – 112 процент, — дип сөйләде Рөстәм Моратов.

Фаразланган чорда тулай төбәк продукты үсеше сәнәгать җитештерүе, кулланучылар базары, шулай ук төзелеш секторы һәм авыл хуҗалыгы үсеше хисабына тәэмин ителәчәк.

Агымдагы елда сәнәгать җитештерүе индексы буенча 105 процент дәрәҗәсенә чыгу планлаштырыла. Өч еллык чорда сәнәгать җитештерүе үсеше ел саен уртача 105,5 процент тәшкил итәчәк.

Беренче вице-премьер үзенең чыгышында 2022 елда авыл хуҗалыгы продукциясен җитештерү, 2021 ел белән чагыштырганда, 21,2 процентка артачак, 2024 елга үсеш темпы 103 процент тәшкил итәчәк, дип белдерде. Алга таба үсеш терлекчелек комплекслары һәм сугаруның яңа системаларын төзү буенча эре инвестицион проектлар исәбенә тәэмин ителәчәк, аларны гамәлгә ашыру терлек һәм кош ите, сөт һәм бөртекле культуралар җитештерүне арттырырга мөмкинлек бирәчәк.

Башкортстан Республикасы белән Русия Төзелеш министрлыгы арасында «Торак» төбәк проектын гамәлгә ашыру турындагы килешүне исәпкә алып, 2024 елга 3 миллион квадрат метрга кадәр арттыру планлаштырыла. Рөстәм Моратов аңлатканча, үсеш республикада яңа федераль инструментларны – инфраструктур бюджет кредитларын, инфраструктур облигацияләрне һәм «Стимул» программасын гамәлгә ашыру хисабына тәэмин ителәчәк.

Башкарылган төзелеш эшләре күләме уртача вакытка 102,5-103,5 процент дәрәҗәсендә фаразланыла.

Фаразланган чорда уртача хезмәт хакы тотрыклы рәвештә үсәчәк һәм 2024 елга 50,4 мең сумга җитәчәк, реаль керемнәр ел саен 99,8 проценттан 2022 елда 101,4 процентка кадәр җитәчәк.

Эшсезлек акрынлап кимиячәк һәм 2024 елда гомум эшсезлек дәрәҗәсе 4,3 процент тәшкил итәчәк.

Фото: pravitelstvorb.ru