Белоруссиядәге хезмәттәшләребез белән максатыбыз уртак

Республика Башлыгы Радий Хәбиров җитәкләгән Башкортстан делегациясе рәсми визит белән Белоруссиядә.

Визит кысаларында Башкортстан Республикасы сәүдә һәм хезмәтләр министры Алексей Гусев Беларусь Кулланучылар җәмгыятьләре берлеге җитәкчелеге белән очрашты.

- Хезмәттәшләребезнең үсеш планнары күп яктан безнеке белән охшаш - без бер юнәлештә барабыз. Болар - күмәртәләп сату товар әйләнешен үстерү дә, хәзерләү эшчәнлеге дә, халыктан артык продукция сатып алу да, икенчел чималны тирәнтен эшкәртү дә, җәмәгать туклануы да, - дип сөйләде Алексей Гусев.

Очрашуның төп максаты - Белоруссия территориясендә Башкортстан кулланучылар җәмгыятьләре продукциясен сату буенча да, Беларусь кооперативлары продукциясен сату буенча да тәҗрибә алмашу һәм үзара товар әйләнешен җайга салу.

- Кулланучылар кооперациясен үстерүдә төбәкара дәрәҗәдә генә түгел, дәүләтара дәрәҗәдә дә хезмәттәшлек итәргә килештек, - дип өстәде Алексей Гусев.

Делегация программасына, шулай ук, Белоруссия кулланучылар җәмгыятьләренең төп күмәртәләп сату предприятиесе - "Белкоопсоюз"ның "Белкоопвнешторгы" белән танышу кертелгән иде. Компания эшчәнлеге Белоруссия һәм чит ил җитештерүчеләре товарларын экспорт-импортка, күмәртәләп һәм ваклап сату, йөк ташу, җәмәгать туклануы, шулай ук табигый мехтан эшләнмәләр җитештерү һәм сатуга юнәлтелгән.