Эшкуарларга ярдәм чаралары артачак

"Ике ел дәвамында коронавирус пандемиясендә без эшкуарларга ярдәм итү буенча яхшы тәҗрибә тупладык. Бу вакыт эчендә республикада эшкуарлар саны артты, компанияләр киңәя, яңа эш урыннары булдырыла. 2021 елда гына да Башкортстанда кече һәм урта бизнесның 26,2 мең субъекты барлыкка килде.

Бу федераль һәм төбәк дәрәҗәсендә каралган ярдәм чаралары нәтиҗәле, ә иң мөһиме - кешеләр безгә ышана һәм, барлык потенциаль кыенлыкларга карамастан, эшләргә әзер булуын аңлата.

Хәзер безнең алда - яңа киртәләр һәм яңа мөмкинлекләр. Санкцияләр шартларында икътисадның элек чит ил компанияләре биләгән яңа "киштәләре" бушап кала, хәзер алар үзебезнекеләргә ачыла. Һәм безнең өстенлекле бурыч - эшкуарларга ярдәм итү. Безгә моны бик тиз эшләргә кирәк.

Без узган ике елда кабул ителгән барлык төбәк ярдәм чараларын тулысынча саклыйбыз. Аларга яңа, кризиска каршы торучыларын өстәячәкбез. Безнең Эшкуарлык буенча дәүләт комитеты базасында оператив штаб эшли, аның бурычы - хәлне мониторинглау һәм бизнес сорауларына һәм проблемалы ситуацияләргә тиз җавап бирү. Бизнес-шерифларны да шундый ук эшкә юнәлтәбез.

"Башкортстан микрокредит компаниясе" элек эшкуарларга бирелгән заемнар буенча "кредит каникулларын" рәсмиләштерүгә кереште. Төбәк лизинг компаниясе ташламалы лизинг буенча шартларны тулысынча саклап калды. Төбәк гарантия фонды эшенә дә шул ук хәл кагыла.

Без салым ташламаларын 2020 елда гамәлдә булган салым салуның гадиләштерелгән системасы буенча кайтару мөмкинлеген карыйбыз. Алга таба патент системасы буенча салым исәпләп чыгарыла торган потенциаль керемнәр күләмен киметергә планлаштырабыз. Болар барысы да эшкуарларга финанс йөкләнешен киметергә мөмкинлек бирәчәк", - дип язган бүген социаль челтәрләрдә республика Башлыгы Радий Хәбиров.