Уфада Дәүләт думасы Эксперт советының күчмә утырышы үтте

Утырышның модераторы Русия Дәүләт думасы депутаты, Сәнәгать инфраструктурасын (индустриаль парклар, технопарклар һәм кластерлар) үстерү буенча эксперт советы рәисе Александр Козловский булды.

Ул искә төшергәнчә, утырыш «Яңа икътисади шартларда предприятиеләр кооперациясе» халыкара фәнни-гамәли конгрессы кысаларында уза. Һәм конгрессның бөтен киң программасы нәтиҗәләре буенча иң нәтиҗәле карарлар Петербург халыкара икътисади форумында карау өчен чыгарылачак.

Александр Козловский билгеләп үткәнчә, Башкортстан мәйданчыгы конгрессны үткәрү өчен очраклы гына сайланмаган.

- Безнең тәҗрибә, бигрәк тә Башкортстан тәҗрибәсе, белән уртаклашу мөмкинлеге бар, анда республика Башлыгы Радий Фәрит улы Хәбиров Сәнәгатьне үстерү фонды базасында махсуслаштырылган оешмалар эшен оптимальләштерү буенча сынау проектын гамәлгә ашыра. Биредә бу коралны гамәлдәге итү өчен тәкъдимнәр яңгыраячак. Хәзер безгә иң беренче чиратта кирәк булган продукцияне җитештерү өчен бизнеска ярдәм итүгә игътибар бирергә кирәк, - диде Александр Козловский, кластер сәясәтенең беренче чиратта әһәмияткә ия булуын ассызыклап.

Башкортстан Хөкүмәте Премьер-министры Андрей Назаров үз чыгышында республикада кластерлы якын килүнең беренче ел гына тормышка ашырылмавын ассызыклады.

- 2014-15 елларда нефть химиясе территориаль кластерын формалаштыру буенча чаралар күрелде. Аңа 83 оешма керә. Аның кысаларында кече тоннажлы нефть химиясен һәм радиоэлектроника прототиплаштыру үзәкләре булдырылды. Сәнәгать кластерлары инструменты шактый динамик үсеш ала. Хәзерге вакытта Русиядә 39 төбәктә 47 сәнәгать кластеры бар. Алар 920ләп предприятиене берләштерә. Башкортстанда мебель кластеры уңышлы эшләп килә. Тагын 8 кластер формалаша, аларда без кризиска һәм санкциягә каршы көн тәртибен гамәлгә ашыруның мөһим элементларының берсен күрәбез, — дип хәбәр итте Премьер-министр.

Андрей Назаров, шулай ук, Экспертлар советының алдагы утырышларында кластер проектларына ярдәм итү механизмнары турында фикер алышынганын искә төшерде.

- Әлеге ярдәм чаралары төбәк дәрәҗәсендә бик кирәк булыр иде. Өстәвенә, бездә бу юнәлеш күптән эшләнә. Мәсәлән, сәнәгать кластерларын формалаштыру һәм үстерүгә чыгымнарны субсидияләү каралган, — дип ассызыклады Премьер-министр.

Фото: pravitelstvorb.ru