Инвестицияләр күләме арта

"Бездә барлыгы шундый 288 проект инвестицияләре күләме 777,9 миллиард сум һәм 34,6 мең эш урыны булдырылган.

Объектларны өстенлеклеләр исемлегенә кертү эшкуарларга дәүләттән махсус ташламаларга һәм гарантияләргә дәгъва кылырга мөмкинлек бирә. 2011 елдан, программа гамәлгә керә башлагач, инвесторларга дәүләт ярдәме чаралары 14 миллиард сумнан артыкка бирелде, шул исәптән салым ташламалары - 12 миллиард сум тирәсе, субсидияләр - 2 миллиард сум. Узган елда милеккә һәм табышка салымнар буенча ташламаларга, җир кишәрлеген сатуларсыз арендага бирүгә һәм төбәк Авыл хуҗалыгы министрлыгы линиясе буенча төрле субсидияләргә иң зур ихтыяҗ булды.

Проектларны гамәлгә ашыру чорында инвесторлар тарафыннан 373,3 миллиард сум акча кертелде һәм 10,8 мең эш урыны булдырылды. Инвестицияләр салу сәнәгать, төзелеш, авыл хуҗалыгы һәм юл хуҗалыгы өлкәләрендә гамәлгә ашырылган.

Стәрлетамак районында быел үз азык базасы булган индустриаль сөтчелек комплексы төзелеше башланачак. Проект кысаларында инвестор Кононовский һәм Николаевка авылларында хезмәткәрләр өчен торак төзергә планлаштыра. Проектка 2,9 миллиард сум салыначак һәм 182 эш урыны булдырылачак.

Инвестиция проектларын гамәлгә ашыру - яңа эш урыннары, югары технологияле производстволар, кирәкле продукция һәм салым, без аларны социаль ихтыяҗлар өчен җибәрә алабыз: мәктәпләр, балалар бакчалары, дәваханәләр, спорт, мәдәният объектлары", - дип язган бүген социаль челтәрләрдә Хөкүмәт Премьер-министры Андрей Назаров.