Радий Хәбиров Казахстан партнерлары белән багланышларның үсеше турында сөйләде

Әлеге чарада видеоэлемтә режимында утырышта ике дәүләт башлыгы Владимир Путин һәм Касым-Жомарт Токаев чыгыш ясадылар. Русия Президенты ил төбәкләре белән Казахстан арасындагы хезмәттәшлекнең төп өстенлекләрен билгеләде.

- Ырынбурда ике илнең 40 төбәге хакимият органнары җитәкчеләре җыелган, алар - закон чыгаручылар, министрлыклар һәм ведомстволар, бизнес, фәнни һәм иҗтимагый даирәләр вәкилләре. Мондый киң форматта коллегалар төрле өлкәләрдә - сәясәттә, икътисадта, гуманитар өлкәдә икеяклы үзара хезмәттәшлек мәсьәләләре турында фикер алыша. Русия-Казахстан төбәк форумнары, гадәттәгечә, югары нәтиҗәле уза, Русия Федерациясе субъектлары һәм Казахстан өлкәләре арасында партнёрлык элемтәләре челтәрен киңәйтүгә ярдәм итә, һәрьяклы хезмәттәшлек комплексын үстерүгә сизелерлек өлеш кертә, - дип ассызыклады Владимир Путин.

Казахстан Президенты Касым-Жомарт Токаев ассызыклаганча, сәүдәдә ике як өчен дә файдалы шартлар булдыру сыйфатлы икътисади үсешнең ачкычы булып тора.

- Узган айда без илләребез өчен әһәмиятле датаны - дипломатик мөнәсәбәтләр урнаштыруның 30 еллыгын билгеләп үттек. Бу вакыт эчендә безнең дәүләтләр ныклы дуслык һәм татулык җепләренә нигезләнгән үзара файдалы стратегик партнерлык төзи алды. Безнең илләр арасында ышанычлы һәм конструктив диалог урнаштырылды, хезмәттәшлекнең югары дәрәҗәсенә ирешелде. Русиянең Казахстанга инвестицияләре елдан-ел үсә генә бара. Инвестицияләрнең иминлеген тәэмин итү һәм безнең икътисадка мөмкин кадәр күбрәк җәлеп итү өчен барысын да эшләячәкбез. Бу безнең илләр арасында нәтиҗәле хезмәттәшлек җайга салынуга тагын бер дәлил булып тора, - диде Касым-Жомарт Токаев.

Башкортстан Башлыгы Радий Хәбиров форумның пленар утырышында чыгыш ясаганда Казахстан төбәкләре белән хезмәттәшлекнең төп юнәлешләре һәм якын киләчәккә өстенлекле бурычлар турында сөйләде.

- Казахстан - Бәйсез Дәүләтләр Бердәмлегендә Башкортстанның төп партнеры. Узган елда төбәкләр арасындагы товар әйләнеше 1,5 тапкырга диярлек арткан һәм 421 миллион доллар тәшкил итте. Казахстан товарлары безнең кулланучылар базарында киң урын алган. Нигездә, бу - яшелчәләр, җиләк-җимеш, кондитер һәм макарон эшләнмәләре. Төрле Казахстан трейдерлары һәм дистрибьюторлары белән эш алып барыла. Республика әлеге форумны безнең икътисади мөнәсәбәтләребезне төзүнең чираттагы нәтиҗәсе буларак карый. 2021 елда Башкортстанның зур бизнес-миссиясе Казахстанда булганда без аларга бик көчле импульс бирдек. Визит нәтиҗәләре буенча без даими эшләүче эшче төркем төзедек, ул хезмәттәшлекнең барлык юнәлешләре буенча "юл картасын" раслады.

Радий Хәбиров белдерүенчә, республиканың Казахстан белән хезмәттәшлеге икътисади гына түгел, мәдәни-гуманитар характерда да. Өстәвенә, Башкортстан Казахстанга химия сәнәгате продукциясен, агач материалларын һәм целлюлоза-кәгазь эшләнмәләрен, авыл хуҗалыгы чималын, машина төзелеше һәм пыяла сәнәгате продукциясен экспортлый.

Фото: glavarb.ru