Төбәктә OZON логистик комплексы төзелә

Исегезгә төшерәбез, бу елның мартында "Ромекс Групп" компаниясе проектын "Инвестиция сәгате"ндә хупладылар. Объект өчен арендага 24,6 гектар мәйданлы җир кишәрлеге бирелгән.

Төбәк җитәкчесе инвесторларга уңышлы хезмәттәшлек өчен рәхмәт белдерде һәм төзелеш эшләрен уңышлы тәмамлауларын теләде.

- Интернет-сәүдә елдан-ел үз өлешен арттыра бара. Һәм безгә "Ромекс Групп" компаниясенең безнең республикага керүе һәм инвестицияләве бик мөһим. Керемнәрнең күләме дә бик җитди. Яңа логистик комплекс OZON өчен эшләячәк. Бу - Русиянең кызыклы продуктлар һәм чишелешләр кертүче алдынгы компанияләренең берсе, - диде Радий Хәбиров.

Республика Башлыгы Радий Хәбиров, "Ромекс" компанияләр төркеме президенты Алексей Прокопенко һәм OZON идарә директоры урынбасары Владимир Гончаревич беренче ташка логистик үзәк төзелеше башлануы турында истәлек тактасы урнаштырдылар.

Алга таба, тантанада катнашучылар журналистларның сорауларына җавап бирделәр. "Ромекс" компанияләр төркеме президенты Алексей Прокопенко инвестиция проектын гамәлгә ашыруга ни өчен Башкортстан сайлануы турында сөйләде.

- Безгә OZON компаниясе партнерларыннан Башкортстан территориясендә үсеш алу теләге турында гариза килде. Без Радий Фәрит улы белән республика ягыннан ярдәм итү мөмкинлеге турында сөйләшүләр үткәрдек. Бу - җир кишәрлеге, субсидияләр алу, инженерлык челтәрләренә тоташу. Республика Башлыгы безне хуплады, региональ хакимият белән берлектә тиешле участокны тиз арада сайлап алдык, - диде Алексей Прокопенко.

Республика Башлыгы Радий Хәбиров проектның Башкортстанда тормышка ашырылуының символик мәгънәгә ия булуын ассызыклады.

- Республика Европа һәм Азия чигендә урнашкан. Бизнесның шундый зур үзәк төзү турында карар кабул итүе бик яхшы. Интернет сәүдәсе әлегә традицион формат түгел. Ул базарның зур өлешен яулый, бу склад кына түгел. Төбәктә бик җитди һәм югары технологияле предприятие барлыкка киләчәк. Монда күп эш урыннары булдырылачак. Без, әлбәттә, "Ромекс" һәм OZON белән хезмәттәшлекне киңәйтүдә кызыксынабыз. Чөнки республика зур - 4 миллион кеше. Төбәк икътисады динамик үсештә. Хезмәт хакы һәм кулланучылар базары күләме арта, - диде Радий Хәбиров.