“АМКОДОР-Агидель” заводы эшли башлады

Исегезгә төшерәбез, 2021 елның декабрендә Радий Хәбиров Беларуська сәфәре вакытында "АМКОДОР" холдингы мәйданчыгында булды һәм аның республика белән хезмәттәшлек перспективалары турында фикер алышты. 2022 елның маенда "АМКОДОР" компаниясе проектын "Инвестиция сәгате"ндә хуплыйлар, сентябрьдә Роман Головченко һәм Радий Хәбиров яңа завод төзелешенә старт бирәләр. Аны төзүгә 3 миллиард сум акча кертелгән.

Башкортстан Башлыгы Радий Хәбиров проектны хуплаган өчен Русия һәм Белоруссия Хөкүмәтләренә рәхмәт белдерде һәм завод коллективын производствоны ачу белән котлады.

- Республика көне алдыннан без искиткеч заманча предприятие эшләтеп җибәрәбез. Шунысы мөһим, биредә күп кенә станоклар – Русия җитештерүе, - дип билгеләп үтте Радий Хәбиров. - Соңгы елларда без бөртеклеләрнең зур уңышын җыябыз. Монда җитештереләчәк җиһазлар безнең агросәнәгать комплексы өчен бик актуаль.

Предприятие бөртекле, кузаклы һәм майлы культураларны урып-җыюдан соң эшкәртү өчен ашлык чистарту-киптерү комплекслары чыгарачак. Елына 40ка кадәр шундый комплекс ясарга планлаштыралар. Тугыз ай эчендә җитештерелгән производствода 500ләп эш урыны барлыкка киләчәк.

- Дәүләт башлыклары Александр Григорьевич Лукашенко һәм Владимир Владимирович Путин яңа производстволар үсешенә һәм гомумән Белоруссия белән Русия арасындагы мөнәсәбәтләргә ярдәм итәләр, – дип билгеләп үтте Роман Головченко. - Яңа предприятие мисалында без кыска вакыт эчендә бергәләп дөнья базарында көндәшлеккә сәләтле продукция булдыра алуыбызны күрәбез.

Русия Хөкүмәте Рәисе урынбасары Александр Новак Русия белән Белоруссиянең кооперация элемтәләрен алга таба ныгыту потенциалын югары бәяләде.

– Яңа производство – технологик суверенитетны ныгытуга өлеш кертүче илебез өчен истәлекле проект, - диде вице-премьер. - Бу - Русия һәм Белоруссия төбәкләренең үсешенә ярдәм итүче сәнәгать өлкәсендә нәтиҗәле халыкара хезмәттәшлекнең ачык мисалы.

Фото: glavarb.ru