+21 °С
Болытлы
Икътисад
24 ноябрь 2023, 05:45
Иртәгәдән соң ни булыр?
Уфада старт алган Халыкара бизнес атналыгында 21 ил һәм Русиянең 89 төбәге вәкилләре шушы төп темага фикер алыша. Уфаның “Торатау” Конгресс-холлында үтүче Халыкара бизнес атналыгына Башкортстан Хөкүмәте Премьер-министры Андрей Назаров старт бирде. Зур форум республика башкаласында 22 ноябрьдән 1 декабрьгә кадәр үтәчәк. Форум чараларында якынча 4 мең кеше катнаша. Алар арасында федераль һәм төбәк власте органнары, үсеш институтлары һәм бизнес-берләшмәләр вәкилләре, 21 ил һәм Русиянең 89 төбәге делегациясе бар.
Иртәгәдән соң ни булыр?
XVI Халыкара бизнес атналыгының төп темасы – “Иртәгәдән соң. Профессиональ берләшмә фаразы”. Чарада катнашучыларга яңа чынбарлыкка һөнәри берләшмә күзлегеннән карарга тәкъдим ителә.
XVI Халыкара бизнес атналыгы кысаларында Башкортстан Башлыгы Радий Хәбиров Беларусь Республикасының икътисад министры Юрий Чеботарь җитәкчелегендәге делегация белән очрашты. Алар берлектәге проектларны гамәлгә ашыру барышы һәм арытаба хезмәттәшлекне үстерү турында фикер алышты.
Башкортстан Башлыгы, шулай ук, Кытай Халык Республикасы делегациясе белән аралашты, аны Халыкара бизнесны үстерү үзәге директоры Ли Янцзюнь җитәкли.
Форум кысаларында Башкортстан Башлыгы Радий Хәбиров Русиянең инновацион төбәкләре ассоциациясе директоры Александр Смекалин белән дә очрашты.
Александр Смекалин Башкортстан җитәкчелегенә Ассоциация эшчәнлегендә актив катнашкан өчен рәхмәт белдерде һәм республиканың венчур инвестицияләү, бизнес-шерифлар институтын булдыру тәҗрибәсен уңай бәяләде.
Премьер-министр Андрей Назаров – “Якын киләчәк бизнес күзлегеннән” дип аталган пленар утырышта чыгыш ясады.
Андрей Назаров билгеләп үтүенчә, Русия, бөтен дөнья кебек үк, глобаль турбулентлык чорын кичерә. Икътисади мөнәсәбәтләр системасы тамырдан үзгәрә.
Андрей Назаров берничә трендны билгеләде. Беренчесе – бизнес алып бару процедураларын гадиләштерү, административ чикләүләрне бетерү, дәүләт белән аралашуны тулысынча санлы платформага күчерү. Икенче тренд – санлы һәм технологик берләшүгә омтылу. Ул тормышның һәм икътисадның барлык өлкәләрен санлаштыру белән бәйле һәм мәгълүмати, нано- һәм биотехнологияләр үсешен күздә то-та. Өченче тенденция – финанс технологияләренең бизнесның барлык өлкәләренә үтеп керүе. Яңа чынбарлык өчен алшартлар булдырылган. Болар – мобиль интерфейслар, заманча технологияләр, биометрия, квант исәпләү-ләре, блокчейн.
XVI Халыкара бизнес атналыгы кысаларында узган “Төзелешнең санлы киләчәге” панель сессиясендә Башкортстан Хөкүмәте Премьер-министры Андрей Назаров санлы вертикальнең үзәк звеносы булып Башкортстанның шәһәр төзелеше эшчәнлеген тәэмин итүнең дәүләт мәгълүмат системасы тора, дип билгеләде.
– Аның нигезендә 40тан артык төр шәһәр төзелеше хезмәтләрен күрсәтү процессы тулысынча автоматлаштырылган. Ә аларның саны 2020 елдан 63 меңнән артып киткән. Быел без аны ун тышкы мәгълүмат системасы белән интеграцияләүне тәмамлыйбыз. Мондый системалар бездә 17 төзелеш компаниясендә гамәлгә кертелгән, – диде Премьер-министр.
Андрей Назаров сүзләренчә, импортны алмаштыруны арттырырга, илебездә уйлап табылган программаларны кулланышка активрак кертергә кирәк.
Халыкара бизнес атналыгы кысаларында Башкортстан Хөкүмәте Премьер-министры Андрей Назаров республика Хөкүмәте белән “Газпромнефть-Төбәк сатулары” компаниясенең рәсми партнеры булган “Уралнефтепродукт” арасында инвестиция ниятләре турындагы килешүгә кул куйды.
– Бу килешү “Уралнефтепродукт”ның Башкортстанда дүрт автомобиль ягулык салу станциясен төзү буенча инвестиция проектларын гамәлгә ашыру буенча хезмәттәшлекне көйләү өчен төзелде, – диде Андрей Назаров.
Башкортстан эшкуарларына юл буе хезмәте өлкәсендә ярдәм итүгә 3 елга якынча 300 миллион сум акча юнәлтеләчәк. Бу турыда беренче вице-премьер Башкортстанның икътисади үсеш һәм инвестицион сәясәт министры Рөстәм Моратов “Үзеңнекен булдыр. Киләчәк юл буе хезмәте – төбәкләрдә эшкуарлыкның үсеш ноктасы” стратегик сессиясе барышында хәбәр итте.
XVI Халыкара бизнес атналыгы кысаларында Башкортстан Хөкүмәте Премьер-министры урынбасары, авыл хуҗалыгы министры Илшат Фазрахманов Кытайның Халыкара сәүдә һәм коммерцияне үстерү үзәге директоры Ли Яньцзюнь, аның урынбасары Ли Чжилэй һәм “Хэнфэн Хэпин Шие” компаниясенең рәисе Ли Вэй белән очрашты.
Кытай вәкилләре Башкортстанның Кытай белән мөнәсәбәтләренең үсеш перспективаларын югары бәяләде.
Арытаба Илшат Фазрахманов Казахстан делегациясе белән очрашты. Казахстан Республикасы вәкилләрен Башкортстан умартачылык тармагының алдынгы технологияләре кызыксындырды.
Казахстан вәкиле Нурымбәт Соктаганов билгеләп үтүенчә, аларның төбәге агросәнәгать комплексында яхшы перспективаларга ия. Ул ассызыклавынча, Казахстан делегациясенә Башкортстанның авыл хуҗалыгындагы перспектив проектлары кызыклы.
