+21 °С
Облачно
Икътисад
6 Июня 2024, 11:31
"Нәтиҗәле эшләвебезне дәвам итәчәкбез"
Петербург халыкара форумы кысаларында Башкортстан Башлыгы Радий Хәбировның Русия сәнәгать һәм сәүдә министры Антон Алиханов белән очрашуы үтте.
"Нәтиҗәле эшләвебезне дәвам итәчәкбез"
Яклар икътисадның индустриаль секторын үстерүнең актуаль мәсьәләләре турында фикер алышты. Алар арасында – оборона продукциясен җитештерүче производстволарны кадрлар белән тәэмин итү.
Федераль министр Башкортстанның Русия индустриаль үсеше локомотивларының берсе булуын ассызыклады.
– Сәнәгать һәм сәүдә министрлыгы республикага һәм Башкортстан территориясендә эшләүче җитештерүчеләргә ярдәм итәргә әзер. Алдыбызга Русия Президенты куйган илебезнең технологик суверенитетын формалаштыру турындагы бурычларны бергәләп хәл итәчәкбез, – диде Антон Алиханов.
Башкортстан Башлыгы Антон Алихановны министр вазыйфасына тәгаенләнүе белән котлады һәм аңа эшендә уңышлар теләде.
– Без Русия Сәнәгать һәм сәүдә министрлыгы командасы белән нәтиҗәле эшләвебезне дәвам итәрбез дип өметләнәбез. Башкортстан – сәнәгать өлкәсендә үсеш алган төбәк. Сезне республикага мөмкинлекләребез белән танышырга чакырабыз, – диде Радий Хәбиров.
Фото Башкортстан Башлыгы сайтыннан.
