"Альтернатива" лидерлыгын ныгыта бара

2017 елдан Башкортстанның Сәнәгатьне үстерү фонды төбәкнең сәнәгать проектларына уңышлы ярдәм итә. Үз эшчәнлеге чорында Фонд 59 миллиард сумга якын инвестицияләр җәлеп итүгә ярдәм иткән, шуларның 23 миллиард сумнан артыгы Русия Сәнәгатьне үстерү фондыннан кергән. Фонд эшчәнлеге нәтиҗәсендә 202 проект гамәлгә ашырылган, бу 4 меңнән артык яңа эш урыны булдырырга һәм 34 миллиард сумнан артык салым җыелуга ярдәм итте, - диде чыгышында республика Башлыгы.

Эшләгән елларында Башкортстан Сәнәгатьне үстерү фонды төбәкнең 25 муниципалитетына инвестиция проектлары өчен ташламалы финанслау бүлде. Иң күп акчалар машина төзелешенә һәм химия сәнәгатенә юнәлтелгән. Хупланган проектлар саны буенча Уфа, Туймазы районнары һәм Стәрлетамак алда бара. Нәтиҗәле партнерлыкның мисалы булып «Ойлтиммаш» җәмгыяте белән хезмәттәшлек тора, ул 2021 елда 10 миллион сумлык заем алган, ә 2022 елда гомум финанслау күләме 167 милион сум булган проектны гамәлгә ашырган. Былтыр предприятиегә 940 миллион сумлык федераль заем хупланган.

Мондый ярдәм чаралары компанияләрнең җитештерү куәтләрен һәм керемнәрен сизелерлек арттырырга мөмкинлек бирде. Мәсәлән, «Альтернатива» заводы өч ел эчендә керемнәрен 1 миллиард сумнан күбрәккә арттырган, ә «Корона» җиһаз фабрикасы һәм «Автокомплект» Бәләбәй заводы күрсәткечләрен 400 миллион сумга арттырган.

- Эшебездә төрле хәлләр була, әлбәттә. Төрле кыенлыкларга карамастан, искерә торган җиһазларны планлы рәвештә яңартуны, шулай ук җитештерү куәтләрен арттыру өчен яңа станоклар сатып алуны дәвам итәбез. Күптән түгел заводка Кытайдан өч термопласт-автомат кайтартылды.

Аларның иң кечкенәсе, ә аның кысу көче - 320 тонна, искергән станокны алмаштыру өчен билгеләнгән. Ул җитештерүчәнлерәк, мондый җиһазларның соңгы сериясеннән, берничә өстәмә, файдалы функцияләре бар. Ул җыелган килеш кайтарылды, шуңа аны эшкә кушу киләсе атнада ук планлаштырыла.

Куәтлерәк ике станокның кысу көче 700 һәм 1200 тонна тәшкил итә. Соңгысы өчен махсус фундамент салдык. Алар сүтелгән хәлдә китерелгәнгә күрә, аларны эшләтеп җибәрүгә Кытай белгече киләчәк. Март ахырына кадәр алар сафка кертелергә тиеш. Бу автомат җиһазлар чыгару өчен каралган. Әлеге эшләнмәләргә ихтыяҗ зур, бүген «Альтернатива» портфелендә заказлар завод куәтенә караганда да күбрәк. Ике станокны сафка кертү нәкъ менә шушы продукция линейкасы өчен җитештерү куәтләрен үстерергә һәм үсә баручы ихтыяҗны канәгатьләндерергә мөмкинлек бирәчәк.

Шул рәвешле, "Альтернатива", пластмассадан халык куллану товарлары чыгаруда Русия лидеры буларак, үз позицияләрен тагын да ныгыта ала, - ди "Альтернатива" заводы генеральный директоры Раил Фәхретдинов.

Быел Фонд сәнәгать проектларына ярдәм итүгә һәм кластерларны үстерүгә игътибарны юнәлтәчәк. Гамәлдәге финанс программаларын камилләштерү һәм фәнни-тикшеренү һәм тәҗрибә-конструкторлык эшләренә ярдәм итүне дә кертеп, ярдәмнең яңа чараларын эшләү планлаштырыла. Җитештерү башлангычларын комплекслы тәэмин итү өчен сәнәгатьне үстерү институтлары белән үзара хезмәттәшлек итү системасын булдыру тәкъдим ителә.

Фото: bashinform.ru