-8 °С
Болытлы
Гәзиткә язылуVKOKTelegramЯRus
Барлык яңалыклар
Гаилә учагы
14 февраль 2021, 14:13

Әнкәй белән сөйләшү

Сез дә күңелегездән газиз кешегез белән аралашып торасызмы?

Сез дә күңелегездән газиз кешегез белән аралашып торасызмы?

Бик ачуы килгән чак булгандыр инде, әнкәй бервакыт: “Бу дөнья­да рәхмәт тә юк, ләгънәт тә юк икән”, дип куйды. “Тәүбә, тәүбә!” — дип өстәсә дә, аның сүзләре колакка кереп калды. Бу сүзләрнең чынга туры килмәвен тели генә бит күңел!

...Гөлнара 17 яшендә уйнаштан бала тапты. Әти-әнисе – хәлле, абыйлары усал-дуамал кешеләр иде, бу вакыйга турында авылда сүз куертырга базнат итүчеләр аз булды. Яңа туган баласын район дәваханәсендә калдырып, үзе Уфага чыгып тайгач, бу хакта бөтенләй “оныттылар”. Бераздан сатучы булып эшләп, ару гына түл җыйган Гөлнара авылга кәттә машинада кайтып йөри башлагач, аңа караш тагын да җылылана төште.
Ул ташлап киткән баланы авылдашлар алды. Берничә ел яшәп тә, бала бәхетен күрә алмаган бер матур пар аны үзенеке итте. Тегенди-мондый сүзләрдән ерак булырга дип, алар Себер якларына ук чыгып китте.
Аннан ел да кайтып торалар иде, билгеле. Гөлнараның гаиләсе, бигрәк әти-әнисе, баланы күреп калырга тырышты. Әмма “әни” кеше үзе түгел. Ул хәтта улы тәрбияләнгән гаиләне үзенә бурычлы итеп саный иде. Үзе кияүгә чыкмый, башкача бала да тапмый. Туганнары гаиләләрендә бала туса, аның өчен кара кайгы. Беренче булса, түзә әле, ә менә кем икенчегә бәби алып кайтырга җыена, ул Гөлнараның кара дошманына әверелә.
Бер көнне авылга кайгылы хәбәр килде – Гөлнараның улы үлгән. Аның яңа әти-әнисе баланы авылга алып кайтып җирләргә булган.
Кайгыларыннан шашар чиккә җиткән, кара көйгән бу икәүне зират капкасы янында юатырга чират тезелде, алар арасында Гөлнараның туганнары да бар, әмма үзе юк. Әнкәй, әллә син хаклы инде...
Бүген район үзәгенә барырга туры килде. Анда әнкәйгә ике тамчы су кебек охшаган апам яши. Аның белән урамга чыксаң, кем генә килеп кочакламый, “Бигрәк әнкәңә охшагансың!” диләр. Олыгайганчы Себердә яшәгән апам аларның күбесен танымый, әмма бу кочаклашулар аңа бик ошый. Мин дә бәхетле! Вафатыңа күпме еллар үтсә дә, сине онытмыйлар, әнкәй, сагынып сөйләгәндә күз яшьләрен яшермиләр. Араларыннан берсе Гөлнараның баласын үстереп, аның үлем хәсрәтен дә кичергән авылдаш­ларымның игезәк бала алып кайтуы хәбәре белән уртаклашты. Болары – үзләре тапканы, әнкәй, син бит хаклы булмагансың, рәхмәтләр яугыры!

Резида ВӘЛИТОВА.
Читайте нас в