Мәхәббәте кулыннан үләрен уйламагандыр да...

Иглин районында Уфа кешесенә хөкем карары чыгарганнар, ул хатынын коега ташлап үтергән. Бу хакта төбәк Тикшерү комитетында хәбәр иттеләр.

Бу хәл 2021 елның 25 сентябрендә кич була. Бакча йортында 44 яшьлек ир үзенең 50 яшьлек хатыны белән талашкан. Гауга вакытында ул аны бау белән буа башлагач, хатын аңын югалткан. Хөкем ителүче хатынны үлгән дип уйлап, аның гәүдәсен 10 метр тирәнлектәге коега ташлаган - ул аларның участогы территориясендә булган. Коены ир гравий, цемент белән күмгән да өстенә су салып куйган. Соңрак ачыкланганча, хатын-кыз буылудан түгел, ә коега килеп төшүдән һәлак булган.

Ике көннән соң, 27 сентябрьдә, уфалы полициягә хатынының югалуы турында гариза белән мөрәҗәгать иткән. Ир 25ендә хатынын Петровское авылы янында ял итү базасыннан автомобиль белән алырга килүе турында сөйләгән, ул анда дус кызлары белән ял иткән. 100 метр чамасы юл үткәч, хатын-кыз юлда, янәсе, кире уйлаган, машинадан чыккан һәм кире киткән. Бу версияне тикшерүчеләр кире кага алган.

- Ахирәтләре янына югалган хатын кире кайтмаган, ә ир-ат автомобиле база янында туктамаган. Ә хатынның кызыннан сорау алганда, кыз әнисе юкка чыккан көндә әнисенең аяк киемен күрүен әйткән, тик аннары аяк киеме югалган, - дип хәбәр иттеләр республиканың Тикшерү комитетына.

Күрсәтелгән дәлилләрдән соң ир-ат хатынын үтерүдә гаебен таныган һәм аның гәүдәсен кайда яшерүен күрсәткән. Иглин район суды аны катгый режимлы колониядә тугыз ел ярым иректән мәхрүм итүгә хөкем итте.

Фото: ufa.kp.ru