+21 °С
Болытлы
Гаилә учагы
10 август 2022, 04:51
Ялан тәпиле әни, карага төренгән әби...
Билгеле яучы, телетапшырулар алып баручы Роза Сябитова оныгына мәчеттә исем куштырган.
Ялан тәпиле әни, карага төренгән әби...
Аның кызы Ксения белән кияве Максим Шевченко гаиләсендә кыз бала туган.
Роза ханым, "ВКонтакте" сәхифәсендә исем куштыру йоласын үтәгәндә төшкән фотоларын урнаштырып: «Ксения искиткеч әни булачак. Мин рәсми рәвештә әби булдым. Яраткан балаларыма хәзинәбез өчен рәхмәт», – дип язган.
Яңа туган балага Щелково шәһәренең Равил мәчетендә "Мирослава" дип исем куштырганнар.
«Бүген безнең гаиләдә зур бәйрәм. Оныгым исем кушу йоласын узды. Ата-бабаларыбызның яклавы астында бәхетле һәм сәламәт булып үссен», – дип язга Роза Рәиф кызы.
«Теленеделя» журналындагы әңгәмәсендә Роза Сябитова оныгының ике исемле булачагын әйткән. Аның сүзләренчә, Мирослава – православ исеме. «Киявебез православие динендә. Ләкин без – татарлар, мөселман динен тотабыз. Балага мөселманча исем кушачакбыз. Оныгымның ике исеме булачак. Ул ике сүздән тора, беренче өлеше татарча «чәчәк» дигәнне аңлата», – дип сөйләгән ул.
Катлаулы гына башлана сабыйның гомер юлы, алдагысы җиңел һәм матур булсын иде!
