Онытылмас сезнең батырлык!

Әйткәндәй, республикада сугыш җиле кагылмаган гаилә юк. Барлыгы 700 меңнән артык якташыбыз фронтка киткән. Шуларның 322 меңнән артыгы яу кырыннан әйләнеп кайтмаган. 1939-45 елларда 700 меңнән артык якташыбыз Кораллы Көчләр сафларына алынган. Алар барлык фронтларда да, меңләгән шәһәр­ләрне һәм авылларны, шул исәптән Европаны азат итүдә, Германиядәге мөһим алышларда катнашкан. Легендар 112нче Башкорт кавалерия дивизиясенең, якташларыбыз Муса Гәрәев, Афанасий Кар­манов, Мәгүбә Сыртланова һәм башка күпләрнең батырлыгы яшь буынга үрнәк итеп куела.

Җиңүне тыл эшчәннәре дә якынайткан. Уфада тыл батырларына һәйкәл ачылу игътибарга лаек. Сугыш чорында республикада нефть чыгарыла, заводларда снарядлар эшләнелә, авиация моторлары җыела. Шул ук вакытта, кыр­ларда иген үсә, госпи­тальләрдә яралылар дәвалана. Әйт­кән­дәй, төбәктә 170 меңгә якын кеше хезмәт чыныгуы үтә. 1942 ел башына Башкортстанга 280 меңгә якын кеше эвакуа­цияләнә. Яңа предприятиеләр оештырыла. 1941 елның июненнән 1943 ел ахырына кадәр 360 завод, фабрика һәм цехлар эшли башлый.

Бөек Ватан сугышы ве­теран­нарының сафлары елдан-ел сирәгәя. Бүген иң яшь ветеранга 89 яшь. Еллар үтсә дә, үсеп килүче буын безгә имин тормыш, аяз күк бүләк итү­челәрнең батырлыгын онытмаска бурычлы.

Уфа мәйданнарында, истә­лекле урыннарында, мәдәният сарайларында Җиңү көненә багышланган чаралар үтте. “Үлемсез полк” Бөтенрусия гражданлык-патриотик акциясендә катнашучылар Октябрь проспектыннан Кольская урамына кадәр атлап үтте. Меңләгән уфалылар Бөек Ватан сугышында катнашкан туганна­рының портретларын тотып барды. Тантаналы колоннада мәктәп укучыларын, интернациональ бурычын үтәгән яугирләрне, чер­нобыль­че­ләр­не, спортчыларны күрергә мөмкин иде.

Әйткәндәй, “Үлемсез полк” акциясен оештыруны Русия Президенты Владимир Путин да хуплый. Күптән түгел Йошкар-Ола шәһәрендә Гомумрусия халык фронтының “Гамәлләр форумы. Төбәкләр” пленар утырышы үтте. Форумда якташыбыз, “Җиңү волон­терлары” иҗтимагый хәрәкәте әгъзасы Александр Юдин Русия Президентына: “Үлемсез полк” акциясендә катна­шачаксыз­мы?” – дигән сорау белән мөрә­җәгать итте. “Мин – күңелем белән һәрчак шушы полк әгъзасы. Авыллар һәм шәһәр­ләр буйлап үтәчәк, үзләренең һәлак булган туганнарын искә алачак, исәннәренә хөрмәт күрсәтәчәк, рәхмәт белдерәчәк кешеләр белән булачакмын. Әлеге акция халык тарафыннан оеш­тырылды. Әгәр дә бу хәрәкәт арытаба да үсешсә, без аңа мотлак ярдәм итәчәк­без”, – дип җавап бирде Владимир Путин. Мәгълүм булуынча, былтыр Русия Прези­денты “Үлемсез полк” акция­сендә үзе дә катнашты. Хәзер чара халыкара дәрәҗәдә үтә.

Кичен Ленин исемендәге мәйданда уфалыларга, кунакларга бай эчтәлекле концерт программасы тәкъдим ителде. Сәхнәдә Шәһәр мәдәният сараеның тынлы оркестры, “Мирас” җыр һәм бию фольклор ансамбле һәм башкаланың үзешчән сәнгать коллективлары чыгыш ясады. Театрлаштырылган тамаша да фәһемле булды.
Бәйрәм салют белән тәмамланды.

Башкортстанның шәһәр һәм районнарында Бөек Җиңүнең 71 еллыгына багышланган митинглар, мәдәни, спорт чаралары үтте.

Бакалы

Районда Бөек Җиңү көне зурдан билгеләнде. Бәйрәм иртәсендә район Мәдәният сарае каршында кыр кухнясы оештырылып, чарага килгән һәр ветеранга иртәнге аш тәкъдим ителде. Сәхнәдә халык һәм үрнәкле исемен йөртүче үзешчән сәнгать коллективлары концерт күрсәтте. Парад тәмамлануга район хакимияте башлыгы Александр Андреев сүз алды:

— Бөек Ватан сугышы ветераннарының сафлары елдан-ел сирәгәя бара. Бүген районда нибары 36 Бөек Ватан сугышы ветераны яши. Үлгән­нәренең — каберен, исән­нәренең кадерен белсәк иде, — диде Александр Георгиевич һәм килер буыннарга тыныч тормыш бүләк иткәннәре өчен ветераннарга рәхмәт белдерде.

Митингтан соң чарада катнашучы ветераннар хакимият башлыгы белән бергә “Геройлар аллеясе”ндәге Бөек Ватан сугышында башларын салган бакалыларның исемнәре уеп язылган мәрмәр плитәгә чәчәкләр салды. Яу кырында ятып калганнарны бер минут тынлык белән искә алганнан соң, бәйрәм салюты атылды. Арытаба хакимият каршындагы мәйданда җиңел атлетика буенча эстафета үтте, бер үк вакытта район Мәдәният сарае каршындагы мәйданда бәйрәм концерты барды. Кичен анда “В бой идут одни старики” фильмы күрсәтелде.

Чакмагыш

Районда Җиңү бәйрәме бик күп катнашучыларны үзенә җыйды. Алар арасында Бөек Ватан сугышы ветераннары, оешма-предприятиеләр хез­мәткәрләре, мәктәп укучылары бар иде. Бөек Җиңүнең 71 еллыгына багышланган митингта район хакимияте башлыгы Риф Йосыпов, Рес­публика Хәрби комиссариа­тының Чакмагыш районы буенча бүлек начальнигы Альберт Хәбиров, район ветераннар советы рәисе Идгар Еникеев катнашты һәм чыгыш ясады.
Бәйрәм уңаеннан районда ”Үлемсез полк” акциясе үтте, аны хакимият башлыгы Риф Йосыпов җитәк­ләде. Бу көнне районның үзәк урамнарына “Спасибо деду — за победу!” девизы астында ретро автомобильләр дә чыкты. Чарада барлыгы 12 автомобиль катнашты.

Бөек Җиңүнең 71 еллыгы уңаеннан уздырылган чаралар зур бәйрәм концерты белән тәмамланды.

Илеш

Бөек Ватан сугышына районнан 10 меңнән артык кеше киткән, шуның яртысыннан күбрәге яу кырында ятып калган. Бүгенге көндә сугыш ветераннарының нибары 41е исән-сау.

Бөек Җиңүнең 71 еллыгын район зур әзерлек белән каршы алды: барлык мәгариф учреж­дениеләрендә тематик чаралар һәм кичәләр, дәресләр, сыйныф сәгатьләре, ветеран­нар белән очрашулар, ярышлар үткәрел­де. Икенче ел рәттән район үзәгендәге 2нче балалар һәм үсмерләр спорт мәктәбендә Советлар Союзы Герое Әнвәр Абдуллин истәлегенә йөзү буенча турнир оештырылды. Анда Татарстанның — Ак­таныш, Минзәлә, Мөслим, шулай ук республиканың Дүртөйле, Илеш районнарыннан барлыгы 100дән артык укучы катнашты.

9 май иртәсе бәйрәмчә кәеф белән башланып китте. Башта район хакимияте башлыгы Илдар Мостафин һәм Бөек Ватан сугышы ветераннары Дан монументына чәчәкләр салды. Арытаба “Үлемсез полк” парады оештырылды.

Үзәк мәйданда тантаналы митинг башланды. Иң беренче булып район хакимияте башлыгы Илдар Мостафин сүз алды. Аннары Бөек Ватан сугышы ветераны Риза Хәкимов, республика Хәрби комисса­риатының Дүртөйле районы һәм шәһәре, Илеш районы буенча бүлек начальнигы Мәгъдәнур Хөснияров, район ветераннар советы рәисе Анатолий Романов, Т. Рахманов исемендәге мәктәпнең 11нче сыйныф укучысы Айдар Суханов чыгыш ясады.

Җиңү парадыннан соң район Мәдәният сараеның үзешчән сәнгать коллективлары театрлаштырылган та­маша тәкъдим итте. Арытаба үзәк мәйданда “Маяк” район гәзите кубогына җиңел атлетика буенча эстафета үтте. Район үзәгендәге 1нче бала­лар-үсмерләр спорт мәктәбендә — шашка, футбол, волейбол буенча ярышлар, район Мә­дәният сарае янындагы асфальтка рәсем төшерү буенча балалар конкурсы оештырылды.

Благовар

Бөек Ватан сугышында районнан 10 меңнән артык кеше катнаша, шуларның 4926сы ил азатлыгы өчен канкойгыч көрәштә башын сала.

Районның төрле төбәк­ләрендә Бөек Җиңүнең 71 еллыгына багышлап үткәрелгән бәйрәм чараларында әлеге саннар даими кабатланып торды. Әйе, олы Җиңү бик авыр югалтулар, гаять күп корбаннар бәрабәренә яуланды. Шунысы игътибарга лаек, халкыбыз батырлыгы кешеләр күңеленнән җуелмый, иң мөһиме – Бөек Ватан сугышы каһарманнары, тыл батырлары турында истәлек бүген дә яшь буын күңелендә саклана.

Языково авылында 9 майда үткән тантаналы митингта кадер-хөрмәтнең иң зуры хәзерге вакытта сафта калган сугыш ветераннарына, яугир­ләрнең тол хатыннарына, тыл хезмәтчәннәренә күрсәтелде. Район хакимияте башлыгы Юрий Коземасловның бәйрәм уңаеннан тәбрикләү чыгы­шында билгеләнүенчә, 1945 елның 9 мае тарихта бездән ераклашкан саен, Җиңүнең кадере арта, тынычлык бәһасын яхшырак аңлыйбыз.

Быелгы бәйрәм рухы да моны ачык раслады. Бөек Ватан сугышы яугирләре истә­легенә куелган “Мәңгелек ут” мемориаль комплексын халык ташкыны каплап алды. “Үлем­сез полк” парадында меңгә якын кеше катнашты. Аннан соң тантаналар район Мә­дәният сараенда дәвам итте, бәйрәм уңаеннан биредә үзеш­чән сәнгать осталары концерты үтте.

Җиңү көне уңаеннан оештырылган чаралар спорт ярыш­лары, әдәби һәм музыкаль кичәләр белән үрелеп барды. Кичке якта район үзәгендәге мәйдан янә халык белән тулды. Күз яшьләренә манчылган истәлекле дата бәйрәм салюты булып балкыды.

Дүртөйле

Районнан Бөек Ватан сугышына 11 меңнән артык кеше киткән, шуларның 6533е мәңге­леккә яу кырында ятып калган. Җиңү язын якынайту өчен го­мерләрен кызганмаган батыр­ларның истәлеген йөрәк түрен­дә кадерләп саклый дүртөй­лелеләр. 9 май — олуг бәйрәм көнендә аларның исемнәре, як­ты образлары тантана тү­рендә булды: күңелләрне тет­рәндереп, шәһәр урамнары буй­лап “Үлемсез полк” узды, дәһшәтле сугыш чоры җыр­ла­ры яңгырады.

Шәһәрнең үзәк мәйданында кадетлар, төрле гаскәрләрдә хезмәт итүче солдатлар булып киенгән укучылар, хәрби техника катнашлыгында зур парад оештырылды. Аннары яше-карты очы-кырые күренмәгән агым булып Агыйдел елгасы буена төште. Һәйкәлләргә кып-кызыл чәчәкләр ятты, каһар­маннар истәлегенә залплар яңгырады.

Борай

Бәйрәм тантаналары район Мәдәният сараенда башланып китте. Бөек Ватан сугышы ветераннарын, ә бүгенге көндә аларның бары тик 32се генә исән, һәм җыелган халыкны район хакимияте башлыгы Борис Нурисламов тәб­рикләде.
Бәйрәм концертыннан соң, борайлылар “Кайгылы ана” һәйкәленә юнәлде. Биредә митинг, аннары хәрби парад узды. Үзешчән артистлар театрлаштырылган тамаша күр­сәтте. Бер читтә сугыш елла­рының гәүдәләнеше булып кыр ашха­нәсе эшләде: казаннарда карабодай боткасы пеште.

Җиңү көнендә тагын бер зур чара — Советлар Союзы Герое Таҗетдин Гыйләҗет­ди­нов истәлегенә “Танып” стадио­нында җиңел атлетика эстафетасы үтте.

Кушнаренко

Биредә бәйрәм тантаналары Советлар Союзы Геройлары аллеясенә һәм һәйкәлләргә чәчәкләр салудан башланды. Район үзәгенең Җиңү мәйда­нында хәрби парад, театрлаштырылган тамаша, зур концерт күрсәтелде. “Үлемсез полк” проектына мәктәп укучылары да, олы яшьтәге кушнаренколылар да бик теләп кушылды. Елдан-ел сафлары сирәгәюче Бөек Ватан сугышы ветеран­нарының һәркайсы, ә 71нче Җиңү язын аларның 27се генә күрә алды, зур хөрмәт, игътибар белән чолгап алынды.

Бишбүләк

Районда Бөек Җиңүнең 71 еллыгына багышланган чаралар апрель аенда ук старт алды. Мәктәпләрдә Батыр­лык дәресләре узды. Аларда, сугыш һәм хезмәт ветераннары белән беррәттән, төрле кайнар нокталарда илебез иминлеген саклаган, орден-медальләр белән бүләкләнгән Бишбүләк егетләре һәм кызлары катнашты. “Картәтием белән горурланам!” дип аталган бәйгедә укучы балалар Бөек Ватан сугышында һәм кайнар нокталардагы канлы бәрелеш­ләрдә катнашкан дәү әтиләре, якын туганнары турында истә­лек­ләр, фотоальбомнар әзер­ләде.

Төп тантаналар Бишбүләк-нең үзәк ял паркындагы обелиск янында узды. Район хакимияте башлыгы Наил Гатауллин якташларын, бәйрәмгә кайткан кунакларны сәламләп, ераклашкан саен күңелләре­безгә якынрак була баручы Бөек Җиңү көне белән котлады.

Дәүләкән

9 май тантаналары традиция буенча тимер юл вокзалы янында урнашкан Солдат һәйкәленә чәчәкләр салудан һәм илебез иминлеге хакына гомерен аямаган якташлар истәлегенә бирелгән салюттан башланды. Соңыннан бәйрәм чаралары район хакимияте, Мәдәният сарае каршындагы үзәк мәйданда дәвам итте. Өлкән сыйныф укучыларының хәрби парад-смотрын, тынлы оркестр чыгышын караган ветераннарның йөзләре яктырды, күзләре яшьләнде. Бәй­рәм­гә җыелган халыкны район хакимияте башлыгы Илшат Фазрахманов котлады. Дәүлә­кәннең танылган сәнгать осталары якташларын, кунакларны берничә сәгатькә сузылган зур бәйрәм концерты белән куандырды.

Миякә

Миякәлеләр Бөек Җиңүнең 71 еллыгын игенче өчен бик куанычлы һәм мөһим булган үз җиңүе белән каршылады — күмәк хуҗалыкларның күп­че­леге 9 майга кадәр төп чәчү эшләрен тәмамларга өлгерде.

— Ел игенчелек өчен уңай килә — туфрак кар сулары белән дә, язгы җылы яңгыр бе­лән дә дымга туенды, җәй­нең дә матур киле­ренә, мул уңышка өмет итәбез, — дип, кыр эшләрендә активлык күрсәткән хуҗалыкларны атап китте тантанага җыелган халыкны бәйрәм белән котлап чыгыш ясаган район хакимияте башлыгы Ришат Актуганов.

Миякәлеләр илебездә күп­тән түгел старт алган “Үлемсез полк” акциясенә ихлас кушылды. Мәктәп балалары Миң­не­гали Гобәйдуллин һәйкәле, башка геройларның бюстлары куелган Җиңү паркына сугышта катнашкан ерак картә­ти­лә­ренең, әби-баба­ларының портретларын тотып килде. Бик күп автоһәвәскәрләр машина­ла­рының ал тәрәзә­сенә үзләренә якын булган сугыш ветеран­на­рының фотоларын урнаштырып йөрүне үз итте.

Туймазы

Җиңү көне алдыннан район хакимияте башлыгы Айдар Суфиянов сугыш ветераннары белән бәйрәм табыны артында очрашты. Язгы бәйрәм алды кәе­фе әңгәмәгә ихласлык өстә­де.

Фронт һәм тыл каһарман­нары истәлеген мәңгеләштерү өчен районда зур эшләр башкарыла. 69 һәйкәл куелган, шуларның 16сы – узган елда. Быел бәйрәм алдыннан Каран-Бишенде авылында сугыш каһарманнарына һәйкәл ачылды.

Җиңү көне алдыннан Бөек Ватан сугышының 3 ветеранына, һәлак булган 17 яугирнең тол хатыннарына торак сертификатлары тапшырылды.

9 майда Бөек Ватан сугышында катнашкан якынна­рының портретларын тоткан 2 меңгә якын туймазылы “Үлемсез полк” сафларында шәһәрнең үзәк урамнарыннан үтте. Тантаналы митинг “Кайгылы ана” һәйкәленә чәчәкләр салудан башланды. Геройлар аллеясенә кадәр сугыш ветераннарын юл читенә тезелеп баскан мәктәп укучылары сәламләде. “Спартак” стадионында театрлаштырылган тамаша, ретро техника парады үтте. Шунда ук кыр кухнясы эшләде. “Полкташыңа шалтырат” акциясе кысаларында ветераннар Русия шәһәрләрендә яшәгән дусларына, туганнарына бушлай шалтырата алды. Шул ук көнне тимер юл вокзалында Ленинград өлкәсеннән кайтып килүче Х. Солтанов исемендәге эзтабарлар отряды вәкилләрен каршы алу тантанасы үтте. Кичен шәһәр мәй­данында зур концерт булды.

Яңавыл

Районда Бөек Җиңүгә әзер­лек алдан ук барды, мәктәп­ләрдә, китапханәләрдә, мәдә­ният учреждениеләрендә төр­ле чаралар үткәрелде. Авылларда һәм шәһәрдә оешкан төстә өмәләр узды.

Яңавылдан Бөек Ватан сугышына киткән 10 мең 940 ке­шенең 7359ы яу кырларында ятып кала. Яңавыл халкы сугышта чын батырлык үрнәге күрсәтә, өч кеше Советлар Союзы Герое исеменә лаек була.

Бүгенге көндә 31 ветеран исән, шулай ук район терри­тория­сендә 546 тыл эшчәне яши. Әлбәттә, аларга зур хөр­мәт һәм хәстәрлек күрсәтелә.

Җиңү бәйрәмен, гадәттә­гечә, яңавыллылар югары әзерлек белән үткәрде. Иң зур тантана Яңавыл шәһәренең үзәк мәйданында үтте. Биредә “Үлемсез полк”та тереләр белән беррәттән сугышта башын салган 2 меңнән артык солдат “сафка басты”.

Хәрби һәм Хезмәт Даны монументына чәчәкләр салганнан соң, “Җиңү салюты” дип исемләнгән концерт үтте, ветераннар өчен биредә солдат боткасы пешерелде. Бәйрәм кичкә кадәр дәвам итте. Шулай ук бу көнне төрле спорт чаралары, җиңел атлетика кроссы узды.

Тәтешле

Район илгә дүрт Советлар Союзы Герое биргән, аларның исемнәре һәйкәлләрдә чагыла. Фронтка барлыгы 7260 кеше китеп, аларның 4590ы яу кырында ятып калган.

Район бәйрәмне зур әзер­лек белән каршы алды. Авылларда өмәләр үтте, район тер­риториясендә урнашкан 26 обелиск, 6 хәрби каберлек тәр­типкә китерелде, тирә-як бәй­рәмчә бизәлде. Бу көнне авыл советларында ветераннарны, тыл хезмәтчәннәрен, сугыш чоры балаларын котлау тантаналары үтте. 9 майда 1нче Зиримзибаш авылында Бөек Ватан сугышында ятып калганнар истәлегенә һәйкәл ачылды. Аны ачуга шушы авыл кызы, тыл хезмәтчәне Фәния Фәтта­хетдинова, авыл халкы, район хакимияте, Күрдем авыл советы зур өлеш кертте.

Район үзәгендә бәйрәм тантаналы төстә үтте, хакимият башлыгы Рушан Гәрәев җитәк­челегендәге делегация Бөек Ватан сугышында һәлак бул­ганнар истәлегенә куелган мемориаль комплекска чәчәк­ләр салды, ветераннарга тәб­рикләү сүзләре яңгырады. Тә­тешлелеләр бөтен ил буенча үткән “Үлемсез полк” акция­сендә теләп катнашты, урамнарга берничә йөз кеше чыкты.

Бу көнне мәктәп укучылары арасында хәрби җырлар смотры, балалар сәнгать мәктә­бе­нең үрнәкле тынлы оркест­ры­ның марш-парады үтте. Мәй­данда сәүдә нокталары эш­ләде, район мәдәният хез­мәткәрләре көче белән әзер­ләнгән концерт барды.

Нефтекама

Бәйрәмгә әзерлек алдан ук барды, балалар бакчаларында, мәктәпләрдә, китапха­нә­ләр­дә, музейларда төрле ак­ция­ләр оештырылды. Бәйрәм алдыннан тыл эшчән­нәре өчен концерт әзерләнде, аларга шәһәр хакимияте бүләк­ләр тапшырды. Әлбәттә, Бөек Ватан сугышы ветераннары да үзлә­ренә тәгаенләнгән бү­ләк­ләрне һәм рәхмәт сүзләрен кабул итеп алды.

9 май көнне шәһәр бәйрәм­чә бизәлде. Иртә белән халык үзәк мәйданга агылды. “Үлем­сез полк”та катнашучылар быел аеруча күп булды, чәч­ләренә чал төшкән абый-апалар да, балалар да бер сафка басып, шәһәр урамнарыннан үтте. Тантана чаралары, гадәт-тәгечә, Җиңү паркында башланды, биредә тамашачылар театрлаштырылган тамаша карады. Арытаба ветераннар бәйрәмчә бизәлгән машиналарда шәһәр буйлап узды һәм Үзәк мәйданда үтәчәк парадка җыелды. Бу көнне аллеяда тематик күргәзмә, бәйрәм концерты оештырылды, сәүдә нокталары эшләде, кичен “Бөек Җиңү җырлары” дип исемлән­гән концерт программасы тәкъ­дим ителде. Бәйрәм чаралары салют белән тәмамланды.

Краснокама

Районнан Бөек Ватан сугышына 8168 кеше китеп, шу­ларның 4188е яу кырында ятып калган. Һәр авыл советында алар истәлегенә һәйкәл­ләр, обелисклар, стелалар урнаштырылган. Һәр елдагыча, Җиңү көне алдыннан алар тәртипкә китерелде. Бүгенге көндә районда 12 сугыш ветераны һәм 467 тыл эшчәне яши. Аларга Хөкүмәт тарафыннан һәрдаим ярдәм күрсәтелеп торыла. 2010 елдан районның 78 ветеранына торак шартларын яхшырту өчен 85 миллион сумнан артыграк финанс ярдәм күрсәтелгән.

Бөек Җиңүнең 71 еллыгын каршылап, авылларда тантаналы митинглар үтте. Район үзәгендә үткән бәйрәм тантанасы Бөек Ватан сугышында һәлак булганнар истәлегенә куелган һәйкәлгә чәчәкләр салудан башланды. Быелгы бәйрәм чаралары аеруча чагу һәм ямьле үтте. Бөек Ватан сугышының барлык авырлыкларын тасвирланган театрлаштырылган тамаша һәркемнең күңеленә үтеп керерлек иде. Урамнардан “Үлемсез полк” үтте, сәхнәләрдән сугыш чоры җырлары яңгырады, биюләр башкарылды, гармунчылар бәйрәме узды.

Калтасы

Район дәһшәтле сугыш елларында Бөек Җиңүне якынайтуга үз өлешен кертте. Туган илебезгә дүрт Советлар Союзы Герое биргән төбәк ул. Биредә ветераннар, өлкән буын турында һәрвакыт хәс­тәрлек күрелә.

Районда бәйрәм чаралары искиткеч җылы һәм матур узды, бәйрәм алдыннан һәр авыл советында тантаналы митинглар үтте, мәктәп укучылары һәм мәдәният хезмәткәр­ләре көче белән концертлар, шулай ук чәй табыннары оештырылды. Гомерләрен Ватанга хез­мәт итүгә багышлаган өлкән буын өстәл артында аралашып, ял итеп утырды.
9 май көнне район үзәгендә бәйрәм тантаналары иртән үк башланды, митингтан соң Бөек Ватан сугышында ятып калганнар истәлегенә куелган һәйкәлгә чәчәкләр салынды. Тамашачылар “Без сугыш теләмибез!” дип исемләнгән музыкаль-хореографик композиция карады, анда районның иң яхшы коллективлары чыгыш ясады. Яшьләр һәм өлкән­нәр “Үлемсез полк” сафларына басты һәм бергәләп район үзәгеннән үтте.