-26 °С
Болытлы
Гәзиткә язылуVKOKTelegramЯRus
Барлык яңалыклар
Иман
7 апрель 2016, 02:00

Иске Кыргыз феномены

Узган елның февраленнән башлап Илеш районы Иске Кыргыз Мәдәният йорты китапханәсе каршында “Иман нуры” клубы эшләп килә. Авылдашыбыз, Уяндыктагы “Халидә” мәчете имамы Салават хәзрәт Шәрипов һәм китапханәче Фәйрүзә Мәҗитова башлангычы һәм дин сабакларын үзләштерергә теләүче авылдашлар соравы буенча оештырылган клуб утырышлары атнага бер тапкыр үткәрелә. Иң куанычлысы шул, клубка әгъза булып керергә теләүчеләр саны көннән-көн арта бара.

Бүген анда дис­тәдән артык кеше йөри. Яңа Аю авылыннан ирле-хатынлы мәга­риф ветераннары Венера һәм Сәгыйть Мул­лаәхмә­товлар, Груздевкадан әниле-кызлы Илмира һәм Фәй­рүзә Мәҗи­то­валар, Рәкыя Шәех­мор­зина, Иске Кыргыздан Дамир Бик­таһи­ров, Ри­сәлия Биктимерова, Флорида Корбанова, Регина Хаҗиева, Рәйфә Шәйх­лис­ламова — клубның иң актив әгъзалары.

— Эшебезне га­рәп хә­реф­ләрен өй­рәнүдән башладык. Бер ел дигәндә Салават хәзрәт Шә­рипов ярдә­ме белән гарәп әлифбасын үзләш­тердек. Хәзер инде искечә китапларны укый алабыз, — ди Фәйрүзә Мәҗито­ва.

Салават хәзрәт гарәп теле буенча дәресләр бирсә, Фәйрү­зә Мәҗитова һәр утырыш барышында мөнәҗәт­ләр өйрәтә, дини бәйрәмнәр турында мәгъ­лүмат белән таныштыра. Моннан тыш, клуб әгъ­залары Гарә­фә, Гашура көннәрен, Корбан гаете, Ураза, Мәүлид кебек ди­ни бәй­рәмнәрне үткәрүдә дә башлап йөри һәм аларда актив катнаша. Мисалга, узган елның 12 декабрендә Пәйгамбәрнең туган көнен — Мәүлид бәйрә­мен зурлап үткәргәннәр. Анда катнашу өчен тирә-як авыллардан йөзгә якын кеше килгән. Башта Уяндыктагы “Халидә” мә­че­тендә Салават хәзрәт вәгазь укыган, аннары барысы да “Ал роза” кунакханә комплексына чәй табыны артына җыелган. Анда шушы чараның спонсоры — игелекле күңелле якташыбыз Рәлиф Сафин үзе дә катнашкан. Чара җыр-моң белән бергә үрелеп барган. Лена Шакир­җанова үзенең дини һәм дөнь­яви темаларга язылган шигырь­ләрен укыса, Фәнзәлия Хуҗиәхмәтова, Нәфисә Рәши­това, Фәйрүзә Мәҗитова мөнә­җәтләр әй­теп, дини бәйрәмдә катнашучыларны сокландырган. Чара бергәләп намаз уку белән тәмамланган.

— Авылыбызда “Иман нуры” клубын булдырып ялгышмадык, дип уйлыйм. Соңгы вакытта халык арасында дин белән кызыксыну арта төште. Кайберәү­ләр аңа — җанына тынычлык табар, икенчеләр күңелен борчыган сорауларга җавап табар өчен, өченчеләр арытабангы тормышында дини каннуннар буенча яшәүне максат итеп куйганга килә, — ди клуб җитәк­чесе, Башкорт­станның атказанган мәдәният хезмәткәре Фәй­рүзә Мәҗитова.

Әйе, кыйблалар буталган, идеаллар югалган заманда җанга тынычлыкны фәкать диндә генә табарга мөмкин. Дин ул — тәртип, бәрәкәт, аклык, пакьлек. Агыйдел буе төбәгендә яшәүчеләр дә моны яхшы аң­лый һәм шуңа да алар актан-ак, пакьтан-пакь Ислам диненә көннән-көн ныграк тартыла.
Читайте нас в