+22 °С
Яңгыр
Иман
24 июнь 2022, 01:00
Ничә дустың өчен дога кыласың?
Раббыбыз безне үзебез өчен генә түгел, ә туганнарыбыз, дусларыбыз өчен дә дога кылырга чакыра.
Ничә дустың өчен дога кыласың?
Иң күп гыйбадәт кылучы сәхабә Әбү Дарда була. Хатыны әйтүенчә, Әбү Дарданың 360 якын дусты булган, ул алар өчен төнге намазларында дога кылган. Хатыны моның сәбәбен сорагач, Әбү Дарда: "Әгәр бер мөселман янында үз кардәше юк чакта аның өчен изге дога кылса, Аллаһ аңа фәрештә җибәрә һәм ул: "Әмин, үзеңә дә шул дога булсын", дип әйтә", - дип җавап биргән (Имам Әхмәтнең "Зөһетлек" китабыннан).
“Хәмдүн әд-Дәлләл кәгазьгә 300 дустының исемен язган һәм һәр төнне алар өчен изге дога кылган. Төннәрнең берсендә кәгазен куеп йоклап киткән. Шул ук төнне төшенә бер дусты керә һәм: “Бүген төнлә шәмеңне кабызмыйсыңмыни?” – дигән. Хәмдүн йокысыннан торып, тизрәк шәмен кабызган һәм кулына кәгазен алган” (Ибн Әл-Җәүзи).
Дустым, кулыңа ак кәгазь алып, дусларыңнан исәннәренең дә, вафат булганнарының да исемнәрен яз. Алар өчен изге дога кылуың тормышыңның бер өлеше булсын, дип яза “Кабан арты” мәчетенең Телеграмм-каналы.
Фото: pixabay.com.
