Марс Уранга иман нурын кайтара

Проектны тормышка ашыручы булып нәсел тамырлары Уран авылы белән тыгыз бәй­ләнгән Марс Тәлгать улы Шә­ри­повның торуы очраклы түгел. Ул 1980 елда шушы авылда туган, балалык һәм үсмер еллары да хәзерге вакытта Каран авыл биләмәсенә караган Уранда үтә. Арытаба Марс Шәрипов язмышын Туймазы районының Кандра авылы белән бәйли, биредәге нефтьчеләр оешмасында слесарь вазыйфасында хезмәт юлын башлый. Югары белемле – читтән торып Башкорт дәүләт аграр университетын тәмамлый. Хәзерге вакытта “РМ — Бурение” җәмгыятенең Кандрадагы бүлегендә әйдәү­че инженер вазыйфасында хезмәт сала.
— Язмышым шулай языл­гандыр, туып-үскән авылымнан ерак та булмаган Кандрада төпләндем, биредә йорт салып, нигез яңарттым, гаилә кордым, — ди Марс Шәрипов. — Җәмәгатем Гөлчәчәк Миргали кызының нәсел тамырлары Бүздәк районының Батырша авылына барып тоташа, бәйләнгән, хәзерге чорда исә, Бүздәк районының баш архитекторы вазыйфасын башкаруга бәйле, Кандрадан Бүздәккә йөреп эшли. Туган авылдан үзем дә аерылмадым диярлек, чөнки биредә әнием яши, шуңа да гаилә белән еш кайтып йөрибез.
Марсның туган төбәгендә нәкъ мәчет төзүгә алынуының шактый җитди сәбәпләре бар. Балачакта Уранда яшәгәндә гаи­ләсендә күңеленә дин юнә­ле­шендә изге орлыклар салынудан килә бу. Шуңа бәйле, Ислам нигезләрен үзаллы өйрәнү белән ге­нә чикләнмичә, Казанда дини уку йортларында гыйлем туплап, һөнәри яктан ныклы әзерлек ала. Моның нәтиҗәсе яшь хәзрәтнең җәмә­гать эшчәнле­гендә дә чагылыш таба, атап әйткәндә, төп хезмә­теннән аерылмыйча, ди­ни йолаларны үтәүдә катнаша башлый. Гому­мән, Марс Шәри­повның дин юлын­дагы игелекле гамәллә­рен Каран тарафларында да халык күреп-белеп тора. Мәсә­лән, Иске Актау авылы мә­че­те белән ныклы бәйлә­неш­ләр ур­наштырып, мәхәл­ләгә дини эшчәнлектә төрлечә ярдәм күрсәтә.
Тарихи чыганаклардан һәм риваятьләрдән 1917 елгы Октябрь инкыйлабына кадәр Уран авылында өч мәчет булуы билгеле. Авылдашлар белән киңәш­ләшеп, шуларның берсен тергезү максатында, Марс Шәрипов башлангычы белән Уранда әзерлек эшләре башлана. 2019 елда була бу. Атап әйткәндә, рәсми документлар тутырыла, урындагы хакимият ризалыгы алына. Бер үк вакытта төзелешкә халыктан акча җыю, спонсорлар җәлеп итү дә оештырыла. Мәчет урыны итеп авылның мә­дәният һәм мәгариф учреж­де­ниеләре янындагы мәйдан сайлана. 2022 елның 20 апре­лендә дини йолаларга туры китереп, яңа мәчетнең нигез ташлары салына.
— Тәкъдим ителгән проектлар күп иде, аларны ныклап өйрәндек, авыл халкы белән киңәшләштек, — дип искә ала Марс хәзрәт. — Ниһаять, Благовар районының Сынлы авылында күтәрелүче мәчет үрнә­генә тукталдык. Үлчәме буенча ул нәкъ менә безнең авылга туры килә: озынлыгы — 11, киң­леге – 7 метр. Иң мөһиме — авыл халкы тәкъ­димне хуп­лады, шуңа да төзелештә актив катнаша.
Чагыштырмача яшь булса да, Марс хәзрәт гаҗәп дәрәҗә­дә тыйнак, моңа өстәп, шактый итагатьле кеше. Халык арасында аның финанслау буенча зур өлеш кертүе яхшы билгеле булса да, ул үзен төзелешне оештыручы, халыкны гомум максатка туп­лаучы итеп кенә исәпли. Аңынча, төп ярдәм авыл халкыннан һәм шушы төбәккә бәйле малтабарлардан килә, шул ук вакытта, спон­сорларның өлеше дә тоемлы. Матди ярдәм күр­сә­түчеләрнең, керткән акчасы күрсәтелеп, мәчет кенәгәсендә тер­кәлә.
Белгечләр исәпләвенчә, хәзерге чорда 3 миллион сумлап акча салынып, төзелеш эшләренең өчтән ике өлеше башкарылган да инде. Сметага ярашлы, янә дә 2 миллион сум таләп ителә, ул иганә­челәрдән җыелачак. Көннәр җылыту белән янә дә эшкә тотын­макчылар, төзелеш материаллары тупланган. Әй­тергә кирәк, Уран авылы хал­кының игелекле гамә­ле Бүз­дәк районы хакимиятендә дә яклау тапкан. Марс хәзрәт бил­геләвенчә, Каран авылы билә­мәсе хакимияте башлыгы Валерий Исхаковның ярдәме дә тоемлы. Менә шулай, бер­дәм тырышлык һәм дә Аллаһ ризалыгы белән төзелешне быелгы Корбан бәйрәменә кадәр төгәлләмәкчеләр.

Фәнүр Гыйльманов,
“Кызыл таң”ның үз хәбәрчесе.
Бүздәк районы.