-17 °С
Болытлы
Барлык яңалыклар
Иман
10 декабрь , 10:25
Язмышны үзгәртеп буламы?
Кешенең язмышы үзе туганчы ук язылган була, диләр бит. Бу хакта динебез нәрсә әйтә? Аны үзгәртеп буламы?
Язмышны үзгәртеп буламы?
Иң беренче чиратта "тәкъдир" һәм "язмыш" төшенчәләре белән танышыйк. Тәкъдир (кадәр) – ул барлык вакыйгаларның вакыты, урыны һәм рәвеше Аллаһ гыйлемендә алдан билгеләнеп куелуы ул. Язмыш (када) – Аллаһ гыйлемендә булган нәрсәләрнең билгеле бер вакытта Аллаһ әмере буенча башкарылуы.
Бу мәгълүмат кайда саклана соң? Тәкъдир кылынган барлык нәрсәләр күктә саклана торган тәкъдир язуында – “ләүхүл-мәхфүз”дә язылган. Гарәп телендәге турыдан-туры мәгънәсе – “саклана торган такта”.
Бу хакта Пәйгамбәребез Мөхәммәд салләллаһу галәйһи вә сәлләм болай дип әйткән: “Аллаһ Тәгалә күкләрне һәм җирне бар иткәнче 50 мең ел алдан кешеләрнең язмышларын язып куйган”.
Коръәндә болай дип әйтелгән: “Ләүхүл-мәхфүздә (күк китабында) язылмыйча, ягъни Аллаһ тәкъдир итмичә, җиргә дә, сезнең күңелләрегезгә дә бернинди бәла-каза, кайгы ирешмәс. Бу бәла-казаның булачагын белү Аллаһ өчен бик җиңелдер” («Әл-Хәдид / Тимер” сүрәсе, 22нче аять).
Димәк, язмышны үзгәртү безнең ихтыярда түгел? Бу сорауга Рәсүлебезнең түбәндәге хәдисе җавап бирә: “Югарыда тәкъдир кылынганны берни дә үзгәртә алмый, догадан кала”.
Дога кылуның төп максаты – һәр нәрсәнең хәерле тәмамлануын сорау. Шул очракта без язмышыбызны хәерле якка үзгәртә алачакбыз.
Фото: Фәнүз Хәбибуллин
Новости партнеров