Сәләтле дә, максатчан да Каран укучылары!

Әлеге татар мәктәбендә сурәт төшерүгә, кул эшләренә оста, иҗатка тартылучы, төрле конкурсларда җиңү яулаучы кызлар һәм малайлар булуы аеруча сөенечле.

Күптән түгел Бүздәк районының Каран мәктәбендә белем алучы ачык йөзле, шат күңелле кызлар һәм малайлар һәм аларга белем бирүче тырыш, чәмле укытучылар белән танышып кайттык. Узган елда капиталь ремонт ясалган мәктәп заманча җиһазландырылган, якты, уңайлы. Биредә 120дән артык укучыга тырышып уку өчен барлык шартлар да бар. Әйтергә кирәк, яшь, максатчан мәктәп директоры Айрат Мансуров җитәкләгән Каран мәктәбе барлык күрсәткечләр буенча да районда алдынгылар исәбендә. Укуда алдынгы һәм иҗади сәләтле, һәркайсының яраткан шөгыле булган укучыларны һәр мәктәптә дә очратып булмый ул. Каран укучылары бу яктан аерылып тора: төркемләп театр түгәрәгенә йөриләр, күпләре сурәт төшерүгә, төрле кул эшләренә, җыр-биюгә, иҗатка оста, спортны үз итүчеләр дә байтак.

Татар теле һәм әдәбияты укытучысы Зөлфия Мансурова җитәкләгән “Салават күпере” курчак театры республика Башлыгының дәүләт телләрен һәм Башкортстанда яшәүче халыкларның телләрен саклауга һәм үстерүгә юнәлтелгән грантын откан. Яңартылган матур театрда яшь актерлар бик теләп шөгыльләнә. Моннан тыш, сурәт төшерүгә, кул эшләренә оста укучылары белән дә горурлана ала Каран мәктәбе. 6нчы сыйныфтан Илнара Хөсәенова, 8нче сыйныфтан Динара Рамазанова һәм 10нчы сыйныфтан Элина Насыйрова — агачтан ясалган уенчыкларны, картиналарны бизәргә, ә 8нче сыйныф укучысы Илшат Сәетов агачка көйдереп рәсем төшерергә бик оста. Укытучылары Ләйсән Хөсәенова аларның һәркайсы турында горурланып сөйләде.

— Түгәрәктә шөгыльләнүче укучыларым — барысы да уку алдынгылары, мәктәп тормышында да актив катнашучылар. Күңелләренә якын шөгыль булгач, дәрестән соң да кул эшләре белән мәш киләләр. Хезмәтләрен төрле конкурсларга, кул эшләре иҗаты фестивальләренә җибәрәбез. Шундый талантлы укучыларыбыз булуына бик сөенәбез, — ди технология укытучысы Ләйсән Әдип кызы.

Балаларның күңел җылысын саклаучы сурәтләр, агачтан ясалган кул эшләре тупланып бара. Биредә укучылар бизәгән картиналарда Габдулла Тукай әкиятләре геройлары, Башкортстан гербы, искиткеч матур табигать күренешләре сурәтләнгән, шулай ук, матрешкалар, аш бүлмәсе өчен җиһазлар, төрле уенчыклар, зур шахмат тактасы урын алган. Алар барысы да бик үзенчәлекле һәм соклангыч.

Әлеге татар мәктәбендә күңелләре иҗатка тартылган, төрле конкурсларда җиңү яулаучы кызлар һәм малайлар да булуы аеруча сөенечле. 11нче сыйныф укучысы Алина Сабитова татар теле һәм әдәбияты буенча район, республика олимпиадаларында берничә ел инде беренче урыннарны яулап килә. Ике тапкыр Казанда төбәкара олимпиадада призер булган. Хикәяләр иҗат итәргә яратучы кыз киләчәктә остазы Зөлфия Җәмил кызы кебек туган тел укытучысы булырга ниятли. Быел татар теле буенча район, республика олимпиадасында беренче урын яулаган 8нче сыйныф укучысы Динара Рамазанова Казанда узачак төбәкара олимпиадага китәргә җыенып йөри иде. Тырыш кызның төбәкара, Халыкара олимпиадаларда тирән белемен күрсәтеп кайтачагына шигебез юк.
Менә шундый чәмле дә, тырыш та, максатчан да кызлар һәм егетләр укый Каран мәктәбендә. Алдагы тормыш юлларында да бу сыйфатлары югалмас, горурланып сөйләрлек матур эшләре күп булыр дип ышанасы килә.

Динар Кәлимуллин фотолары.

Читайте нас:

Теркәлү саны: 2019 елның 24 маендагы Эл сериясе № ФС 77-75682.

Басманың яшь категориясе 12+

___________________

Сетевое издание «KizilTan» зарегистрировано Федеральной службой по надзору в сфере связи, информационных технологий и массовых коммуникаций (РОСКОМНАДЗОР)

Регистрационный номер: серия Эл № ФС 77-75682 от 24 мая 2019 г.

Возрастная категория издания 12+

Гамәлгә куючылары: Башкортстан Республикасы Матбугат һәм киңкүләм мәгълүмат чаралары агентлыгы, Башкортстан Республикасының “Республика Башкортостан” Нәшрият йорты дәүләт унитар предприятиесе.

____________________

УЧРЕДИТЕЛИ: Агентство по печати и средствам массовой информации Республики Башкортостан, Государственное унитарное предприятие Республики Башкортостан Издательский дом «Республика Башкортостан».

Баш мөхәррир Фаил Камил улы Фәтхетдинов.

Кабул итү бүлмәсе телефоны: 8 (347) 272-13-61.

___________________

Главный редактор: Фатхтдинов Фаил Камилович.

Телефон приемной: (347) 272-13-61.

Телефон

8(347)272-13-61

Электрон почта

kyzyltan@mail.ru

Адресы

450079, Уфа шәһәре, Октябрьнең 50 еллыгы урамы, 13 нче йорт

Реклама хезмәте

8(347)272-62-27

Хезмәттәшлек

8(347)272-62-27