Мошенниклар капканына каба язганнар

Учалы районында яшәүче бер ир мессенджерда шалтырату алган. Билгесез кеше үзен кәрәзле элемтә операторы дип таныштырган. Ул үз корбанына сим-картаның гамәлдә булуын озайтырга тәкъдим иткән, һәм аның паспортының сериясен һәм номерын әйтеп биргән, әмма соңгы ике сансыз гына. Җитмәгән саннарны полициягә гариза бирүче үзе әйткән. Шул вакытта гына мошенник, барысы да уңышлы узды, дип хәбәр иткән һәм сөйләшүне туктаткан.

Аннары мессенджерда "Дәүләт хезмәтләре" логотибы белән элемтәдән тагын бер шалтырату килә. Таныш булмаган хатын үзен "Дәүләт хезмәтләре" порталы белгече дип таныштыра һәм мөрәҗәгать итүченең кабинетын читләр ватып керүе, шулай ук акча югалту куркынычы булуы турында хәбәр итә.

Мошенник ирне банкның башка "белгече" белән тоташтырырга тәкъдим итә. Шунда ук видеоэлемтә аша таныш булмаган ир шалтырата. Ир башта аның күрсәтмәләрен үти, ләкин соңрак шикләнә һәм сөйләшүне туктата. Шуннан соң ул онлайн-банкны үзе тикшереп карарга була һәм тупланма счеттан аның агымдагы счетына миллион сум күчерелүен күрә. Ләкин, бәхеткә, акчалар мошенниклар счетына китәргә өлгермәгән, һәм ир үз тупланмаларын саклап калган.

Янә икенче очракта банк хезмәткәре бер хатынны мошенниклар кулыннан "тартып алган". Уфа кешесенә бер хатын мессенджерда шалтырата һәм үзен Пенсия фонды хезмәткәре дип таныштыра. Таныш булмаган хатын, пенсия стажын яңадан исәпләү өчен мәгълүматларны расларга кирәк, ди. Моның өчен алданучы аферисткага "Дәүләт хезмәтләре"нә керү өчен билгеләнгән смс-кодын әйтеп биргән. Кыскасы, сөйләшүләр барышында ханым бер миллион сумга диярлек кредит рәсмиләштергән, ә финанс учреждениесенә килгәч, хезмәткәрләрнең берсе аны мошенниклардан саклау өчен счетларны блоклаган.

Башкортстан буенча Эчке эшләр министрлыгы исегезгә төшерә: акчаларыгызны ниндидер мифик "имин счетка" күчермәгез! Таныш булмаган затларга телефон аша үзегезнең шәхси мәгълүматларыгызны, шулай ук смстан кодны хәбәр итмәгез Үзегезне саклагыз, трубканы куегыз да ят кешеләр белән сөйләшмәгез!