Русия Эчке эшләр министрлыгының Уфа буенча идарәсенең 2нче полиция бүлеге дежур частена мошенниклык турында гариза белән пенсионер хатын мөрәҗәгать иткән.
Мөрәҗәгать итүче сөйләгәнчә, аңа мессенджер аша, янәсе, билгеле кәрәзле элемтә компаниясе хезмәткәреннән билгесез номердан шалтыратканнар. Җинаятьче әбигә, сезнең абонент номеры буенча элемтә хезмәтләре күрсәтү вакыты тәмамлана һәм аны озайтырга кирәк, дигән. Шалтыратучы аңа телефонга кодлар белән СМС-хәбәрләр киләчәк, аларны миңа әйтеп торырга кирәк, дип аңлаткан.
Берникадәр вакыттан соң зыян күрүче белән башка номердан элемтәгә чыгалар һәм үзләрен хәвефсезлек хезмәте хезмәткәрләре дип таныштыралар. Элегрәк аңа гражданканың шәхси мәгълүматларына керү мөмкинлеге булган мошенниклар шалтыраткан, дип хәбәр итәләр. Аннары аферистлар аңа үз акчаларын саклау өчен аларны хәвефсез исәпкә күчерергә кирәк, дип аңлаталар. Гариза бирүче ризалаша һәм "хәвефсезлек хезмәте хезмәткәре" әйткән исәпкә 1 миллион 200 мең сумнан артык акчасын күчерә...
Бер атнадан соң әбекәй җинаятьчеләргә шалтырата алмагач кына акчаларын мошенникларга күчергәнен аңлаган һәм полициягә мөрәҗәгать иткән.
Мошенниклык очрагы буенча җинаять эше кузгатылган.
Автор фотосы.