Җинаять җаваплылыгы 14 яшьтән кертелерме?

 Русиянең Законнар чыгаручылар советы Дәүләт җыелышы-Корылтай керткән закон проектын карауга кереште. Башлангыч наркотикларның законсыз әйләнеше белән бәйле җинаятьләр өчен җинаять җаваплылыгы яшен 16дан 14 яшькә кадәр киметүне күздә тота. Документны карау өчен җаваплы итеп Закон чыгаручылар советының Закон чыгару эшчәнлеген координацияләү һәм законнарны мониторинглау комиссиясе билгеләнде.

“Русия Федерациясе Җинаять кодексының 20 мәддәсенә үзгәреш кертү турында” Федераль закон проекты үсмерләрне наркоҗинаятьчелеккә җәлеп итүнең куркыныч тенденциясенә каршы торуга юнәлтелгән.

─ Без системалы проблема белән очрашабыз: оешкан җинаятьчел төркемнәр балигъ булмаганнарны наркотиклар тарату максаты белән куллана, –─ дип белдерде Дәүләт җыелышы-Корылтай Рәисе Константин Толкачев. –─ Җинаятьчеләр үсмерләрнең мондый гамәлләр өчен 16 яшькә кадәр җинаять җаваплылыгына тарттырылмавыннан оятсыз рәвештә файдалана. Алар яшь кешеләрне котырта, җиңел акча вәгъдә итә һәм шуның белән аларны җинаять юлына этәрә. Безнең бурыч ─– бу бозык практиканы өзү һәм үсеп килүче буынны криминаль йогынтыдан саклау.

Башкортстан буенча Эчке эшләр министрлыгы статистикасы хәлнең кискенлеген раслый: былтыр балигъ булмаганнар тарафыннан наркотиклар әйләнеше өлкәсендә кылынган җинаятьләр саны 556,5 процентка арткан (23тән 151гә кадәр). Тоткарланган 42 наркокурьерның 12се ─– мәктәп, 17се ─ – урта һөнәри белем бирү учреждениеләре укучылары, 1се ─ – вуз студенты һәм 12се уку һәм хезмәт белән шөгыльләнмәгән үсмерләр булган.

─ Үсмерләр еш кына “закладкалар” өчен курьерлар буларак файдаланыла, ─– диде Константин Толкачев. ─– Бу җинаятьләр яшерен характерда. Шуны аңлау мөһим: бу яшьләрнең күбесе аңлы рәвештә, матди файда өчен, үзләре наркотиклар кулланмыйча эш итә. Җинаять җаваплылыгы яшен 14 яшькә кадәр киметү нәтиҗәле хокукый киртә булдырачак һәм әле үзләренең җәзасыз калуын белүче наркотиклар сатуны оештыручылар өчен тоткарлаучы җитди фактор булачак.
Закон проекты наркотик чараларны, психотроп матдәләрне, яки аларның аналогларын законсыз сатып алу, саклау, ташу, әзерләү һәм эшкәртү өчен тиешле җаваплылык чарасын күздә тота.