“Үзешчән композиторлар күп, ул — берәү генә...”

— Вәсил Галимов Чиләбе өл­кәсендә дөньяга килсә дә, өч яшеннән башлап урта мәктәпне тәмамлаганга кадәр Кадер авылында яшәде. Аның әти-әнисе Чиләбедә калган булса, бәлки, ул композитор да булып китәлмәс иде. Без аның күп җыр­ларының авылыбыз табигатен­нән илһам алып язылуын беләбез, — диде кичәдә чыгыш ясап, Кадер авылы биләмәсе башлыгы Рәис Габбасов.
Арытаба сәхнә түренә Вәсил Галимовның се­ңелләре Рәмзия Маликова белән Нәзирә Төхбә­тул­лина чыкты. Алар абый­сының балачагы, үсмер елларыннан кызыклы ха­тирә­ләр белән уртаклашты, аның белән горурлануын әйттеләр.
Композиторны котларга Дүртөйле шәһәреннән дә бер төркем иҗат­чылар килгән иде. Башкортстан Язучылар берлеге әгъзасы Рафаил Хафизов, Светлана Васикова белән Фәнис Рәхмәтуллин Вәсил Галимовка багышлап язган шигырьләрен укып ишеттерделәр.
Кичәгә Югары Яркәйдән Баш­кортстанның атказанган мәдәният хезмәткәре Фирдәвис Маликова белән шагыйрә Фәния Гобәй­дуллина килгән иде. Алар композиторны иҗат бәй­рәме белән котлап, матур теләкләрен җиткерде.
Вәсил Галимовның халык арасында популярлык казанган, озак еллар дәвамында сәхнәдә яң­гыраган җырлары шактый күп. “Ак чишмә”, “Әллә ниләр әйтер идем сиңа”, “Көзге уйлар” (Наҗар Нәҗ­ми сүзләре), “Өянкеләр, тупыллар”, “Кадерем-кадерлем” (Роберт Миң­нуллин сүзләре), “Кайтаваз” (Нәҗип Исламов сүзләре) шундыйлардан. Вәсил Галимов көй язган җыр­ларның берничәсе әлеге кичәдә дә яңгырады. Аларны Башкорт­станның атказанган мәдәният хезмәткәрләре Рәсидә Мостафина, Илшат Сибәгатуллин, төбәкара конкурслар лауреаты Илнар Миңнекәев, авылдашы Рәлиф Шә­галиев башкарды. Чараны музыкаль яктан Айдар Ногманов белән Илдар Хәйбрахманов бизәде, китапханәнең уку залы мөдире Клара Хәлиуллина матур итеп алып барды.
Иң соңыннан композитор үзе дә сүз алып, кайбер җырларның язылу тарихын сөйләде, берни­чәсен үзе башкарды.
Иҗат бәйрәмендә катнашучылар чара дәвамында Вәсил Галимовның үзенчәлекле моң дәрьясында тибрәлде, күңел­ләренә бетмәс-төкәнмәс илһам, рухи көч алды, үзенчәлекле ком­позиторның нәкъ Илештә тууы белән горурланып утырды, бер үк вакытта аның 70 төрле һөнәргә ия иҗатчы икәнлеген белде.
Киләчәктә дә иҗат чишмәгез ургылып агып, үзенчәлекле көй­ләрегез бер-бер артлы туып торсын, Вәсил Җәһит улы!