-21 °С
Болытлы
Гәзиткә язылуVKOKTikTokINSTAGRAM
Барлык яңалыклар

Бәхетне каян көтәргә?

Һәркем бәхетле булырга омтыла, аны үзенчә таба. Баксаң, сере дә гади — сөйгәнең белән гаилә корып, балалар үстерү. Моңа өстәп яраткан эшең дә булса, бәхет касәсе тулы дигән сүз. Тормышның асылы шунда. Тик бүген бәхетне башка төрлерәк күрәләр. Күпләр ялгызлыктан канәгатьлек таба, аерылышу — көндәлек күренеш. Гаилә җәмгыятьнең нигезе булудан туктый бара.

Чынында нәрсә соң ул бәхет? Гомерлек була аламы, әллә мизгел­ләрдән генә торамы? Уфа “Нур” татар дәүләт театрының яңа спек­таклендә сүз шул турыда бара. Төгәлрәк әйтсәк, хатын-кыз бәхете турында. Наил Гаетбайның “Балконнан төшкән мәхәббәт” пьесасы буенча спектакльне режиссер — комедия жанры остасы Илдар Вәлиев сәх­нәләштерә. Автор һәм аның әсәре турында менә нәрсәләр сөйләде ул.
— Наил Гаетбайның пьесалары тормышчан ситуа­цияләр, халыкчан тирән юмор белән җәлеп итә, — ди Илдар Иршат улы. — Әсәр өмет, ышаныч белән тәмамлана. Җиңел, әмма тирән мәгънәле текст эчендә — сәхнә хәрә­кәте. Һәрвакыт гади, “бәләкәй” кеше проблемаларын күтәрә ул. Баксаң, алар хуҗабикәдән алып югары чиновникларга кадәр һәр­кем өчен якын икән. Аның пьесаларында теге яки бу шартларда калган персонаж аша кеше психоло­гиясенең төрле яклары ачыла. Кыскасы, драматург белән тормышка карашыбыз, дөнь­яны күзал­лавыбыз уртак, без — фикердәшләр.
Исеменнән үк күренүенчә, әсәрдә вакыйгалар мәзәк­ләрдәгечә корыла: көтелмәгән кунак балконнан пәйда була. Тик кемнеңдер сөяркәсе тү­гел, ә кыен хәлдә калган бичара. Ялгыз ханымнар кичәсенә килеп кергән ир драматург тарафыннан юкка гына уйлап чыгарылмаган. Аның үз миссиясе бар һәм ул аны тулысынча үти. Ирләреннән аерылып ялгызлыкта бәхет тапкан, “көчле” затларга тис­кәре карашта булган хатын­нарның мөнәсәбәте кискен үзгәрә. Ялгыз йөрәкләрдә өмет чаткысы, киләчәккә ышаныч хисе туа.
Әйе, әсәребез хатын-кыз бәхете турында. Ни өчен мине бу тема кызыксындырдымы? Чөнки мин — ир-ат. Көн саен хатын-кызлар белән аралашам. Без туганнан алып соңгы көнебезгә кадәр хатын-кызларга тыгыз бәйләнгән­без. Шуңа да аларның бәхетенә битараф булмыйча, килеп туган мәсьәләләрне бергәләп хәл итәргә кирәк. Наил Гаетбай әсәрләрендә кешеләр идеаль һәм начарга бүленми, аларның күңел дөньясы гына төрле. Бу фикер пьесада кызыл җеп булып уза. Мәхәббәт тә гел бер халәттә генә тормый: үзгәрүгә дучар була. Бу әсәр аша катлаулы тормыш шартларында ялгышларны, хаталарны гафу итәргә өйрәнергә кирәк. Тормыш белән сәхнә уены арасында аерма зур булса да, спектакль караучылар якын­нарының бәхетенә игътибарлы булсын иде. Кешеләр арасындагы мәхәббәткә корылган мөнә­сәбәтләр, режиссер буларак, мине гел кызыксындыра һәм кызыксындырачак.
Премьера хатын-кызлар бәйрәме алдыннан сәхнәгә чыгачак. Анда театрның билгеле артистлары Миңнинур Сәетова-Гыйззәтуллина, Фи­нә Вәлиева, Лияна Хәерт­динова, Айнур Баянов, Дамира Сәетова, Айрат Фатыйхов һәм башкалар катнаша.
Форсаттан файдаланып, барлык хатын-кызларны — сөеклеләребезне, әниләрне, тормышка якты караш белән багучы яшь кызларны 8 март бәйрәме белән котлыйм. Иң элек, сезгә хатын-кыз бәхете, мәхәббәт телим. Онытмагыз — бар да үз кулыгызда. Без, ир-атлар, үз чиратыбызда, якыннарыбызны яратыйк, хөрмәт итик, яклыйк һәм саклыйк.