+24 °С
Болытлы
Гәзиткә язылуVKOKTelegram
Барлык яңалыклар

Язгы тамчылар” белән Дүртөйлегә яз килде!

Дүртөйле шәһәрендә буранлы ак кышның соңгы көннәре җитүнең беренче билгесе – “Язгы тамчылар” яшь сәләтләр бәйгесе. Яше-карты көтеп ала торган әлеге күркәм бәйрәм район хакимияте канаты астында 90нчы еллардан бирле оештырылып килә. Аның максаты – җыр-биюгә оста, сәләтле балаларга зур сәхнәгә чыгарга ярдәм итү, гүзәл сәнгать дөньясына әйдәү. Катнашучылар саны елдан-ел арту үзе үк бәйгенең халык арасында популярлыгы хакында сөйли.

Быел да әлеге күңелле чара матур үтте. Анда район һәм шәһәр мәктәпләреннән, балалар бакчаларыннан 550 яшь артист катнашты. Мә­дәният сараенда узган Гала-концертта чыгыш ясау бә­хетенә иң-иңнәр генә иреште, әлбәттә.
— Яшь дүртөйлеләрнең чыгышын зур горурлык тойгысы белән тамаша кылам, — диде район хакимияте башлыгы урынбасары Рамил Хәсәнов. — Киләчәктә алар барысы да сәнгать юлыннан китмәс, әлбәттә, тик җыр-моң һәркайсының гомер буе аерылгысыз юлдашы булыр, икенче кояш булып күңел күген балкытыр.
Бәйге финалчылары “Эс­трада җыры. Соло”, “Халык җыры. Соло”, “Вокаль ан­самбльләр”, “Бию коллективлары” номинацияләрендә сә­ләтен күрсәтте. Хәрби-патриотик җырларга да концертта зур урын бирелде.
Семилетка авылы мәктәбе укучысы Ирина Муллахмәтова Гран-при яулады. Милли киемдәге сөйкемле кыз башкаруындагы башкорт халык җыры “Сыңрау торна”ны зал тын да алмый тыңлады.
— Мин бу җиңүгә озак һәм ныкышмалы килдем, — диде 15 яшьлек Ирина. — “Язгы тамчылар” бәйгесендә быел тугызынчы тапкыр катнаштым. Узган елларны призлы урыннар алганым бар иде, ә менә мәртәбәле чарада Гран-при яулау тормышымда онытылмаслык вакыйга булып калачак. Җыр сәнгате нечкә­лекләрен төшенергә өйрәтүче остазларымның һәрберсенә зур рәхмәтемне җиткерәсем килә!
Халык җырын башкаручылар арасында — Раил Гыйлемханов (Семилетка мәктәбе) беренче дәрәҗә, Миләүшә Кадыйрова (Иске Яндыз мәк­тәбе) — икенче дәрәҗә, Азалия Морзаханова (Наҗар Нәҗми исемендәге башкорт гимназиясе) өченче дәрәҗә лауреатлар булды.
Эстрада җырын башкаручылар арасында лауреат дипломнары Диана Хәсәнова (шәһәрнең 2нче лицее), Ләйсән Рәхимҗанова (1нче мәктәп), Дилара Гомәрова, Эльза Сә­лимҗанова (Балалар һәм үсмерләрнең иҗади сәләтен үстерү үзәге), Артур Нигъ­мәтуллинга (музыка мәктәбе) тапшырылды. Бию коллективларыннан “Светлячок”, “Креатив” төркемнәре, вокаль ан­самбльләрдән “Күңелле ноталар”, “Гармония”, “Фрегат”, “Яңгыравыклы тавышлар” югары бәһа алды.
Һәр җырчыны, биючене тамашачы сәхнәдән алкышларга күмеп озатты, ә оештыру комитеты аларның берсен дә истәлекле бүләксез калдырмады.
Читайте нас: