Мәхәббәткә киртә юк

Баксаң, нәкъ бәйрәм алдыннан режиссер Илдар Вәлиев, драматург Наил Гаетбай, композитор Урал Иделбаев белән рәссам Нурия Габидуллинаның уртак эше — “Балконнан төшкән мәхәббәт” спектакленең премьерасы узган. Менә шушы сәхнә әсәре тамашачыларны сискән­дереп, дәртләндереп һәм өметлән­дереп үк җибәргән.
Пьесаның эчтәлегенә күз салыйк.
— Ул мәхәббәт хакында! — ди режиссер һәм бу хисне ничек аңлавын сөйләп китә. — Кызык бит! Ярату көт­мәгәндә килә. Яшьне сорамый — беренче сыйныфта укый­сыңмы син, әллә инде яшең кырыкка җиткәнме. Бу хис безне алга алып бара, “агарта”, үстерә. Ә кайчак кешеләр гаилә корып та бер-берсен яратмый, ихтирам итми. Бу очракта кечкенә сәбәп тә гаилә таркалуга китерә. Әсәр, әл­бәттә, бәхет рецепты белән бүлешми. Әмма уйланырга мәҗбүр итә. Спектакль ахырында — күп нокта.
Әсәрдәге геройлар — ялгыз хатыннар идеаль түгел. Хәер, үзләре моны танырга теләми. Бар явызлык та ир-аттан килә, дигән уйда алар. Ялкау да, намуссыз да, булдыксыз һәм йөремтәл дә икән ирләр, тик... нигәдер аларсыз дөньяның яме юк. Төп вакыйгалар барган Таң­сылу Җиһа­нуровна (Лияна Хәерт­динова) яшәгән йортта да ир-ат юклыгы бик сизелә: урындык аяклары какшаган, ишек тиешенчә ябылып бетми, кыскасы, хуҗалык таралып бара. Тик иң куркынычы анда түгел, ә хатынның ялгыз, бәхетсез булуында. Яңа ел бәйрәмен аның белән үткә­рергә җыелган хатыннар да, баштарак “ир­ләрсез бик тә күңелле ” дип шапырынса, тора-бара алар­ның да “кик­рикләре шиңә”. Ирләргә каршы иң зур тавыш чыгарган Гөлирә (Айсылу Гомәрова), күптән “аерылганнар клубы” әгъзасы Сәлимә (Башкорт­станның атказанган артисткасы Миңнинур Сәе­това-Гыйззәтуллина) һәм, ахирәт­ләренә ияреп, әлеге клубка керә язып калучы Зөлфия (Башкортстанның атказанган артисткасы Резида Зарипова) — алар һәммәсе дә яратуга мохтаҗ. Фәридә (Дамира Сәетова) башкалардан бераз аерылып тора. Ул — баштан ук ирләр яклы. Беренче мәхәб­бәтенә әле дә гашыйк булгангамы, башка ирләрнең дә яхшы якларын күрә белә ул. Тамашачы соңга кадәр мәхәббәтнең тантана итүен, барысының да тәртипкә салынуын көтә: Хәйдәрнең (Руслан Хисаметдинов) яшь­лектә сөйгән Фәридәсе белән кавышуын, Эльмир Хәерт­динов башкаруындагы көнчел ирнең хатыны белән уртак фикергә килүен... Әсәрдә вакыйгалар драматург салган юнәлештә бара. Ә тормышта мөнә­сәбәтләрне һәркем үзенчә кора. Тамашаны караганнан соң бер генә гаиләдә булса да хәлләр яхшы якка үзгәрә икән, спектакльнең искиткеч уңышы булачак бу. Шуңа өметләник.