Барлык яңалыклар
Мәдәният һәм сәнгать
30 апрель 2015, 22:15

Әллүки” – сабыйлар сөенече

Туймазыда шаулап-гөрләп үткән бәйрәмне 300гә якын укучы тамаша кылды.Туймазыда үткән чараларның берсендә сәләтле балаларның чыгышын карап утырганда күңелгә шундый уй килде. Кечкенә артистлар күрсәткән тамашага зал тутырып аларның яшьтәшләрен җыйсаң икән. Нинди бәйрәм булырга мөмкин соң бу? Әлбәттә, “Әллүки” бәйрәме! Сәбәп тә бар кебек. Олпат “Кызыл таң” гәзите канаты астында чыгып килүче республика балалар журналы ун яшен тутырды. Район җитәкчелегенең фатыйхасын алганнан соң, чараны үткәрү урыны итеп Балалар-үсмерләр иҗат сарае сайлангач, җентекле әзерлек башланды.

Бәйрәм рухы исә бусаганы атлап кергәч тә сизелергә тиеш. Ерактан ук игътибарны җәлеп итеп торучы зәвыклы белдерү-плакатлар әзерләнде. Аларны бизәүдә Иҗат сараеның Наталья Давыдова җитәкчелегендәге декоратив-гамәли һәм техник иҗат бүлеге тырышлык салды. Фойеда балаларның иҗади эшләреннән “Әллүки”гә кагылышлы күргәзмә булдырырга карар ителде. Монда шәһәр-район мәктәпләренең татар теле һәм әдәбияты укытучылары, балалар китапханәсе ярдәмгә килде. Иң җитди һәм җаваплы эш – сәләтле бала­ларның чыгышларын, алып баручыларны сайлап алу иде. Бу мәшәкатьләр дә артта калды.
...Ниһаять, ул көн килде. Балалар-үсмерләр иҗат сарае кырмыска оясын хәтерләтә. Сәхнә – чәчәкле болын, ә түрдә аллы-гөлле шарлардан салават күпере калыкты. Экранда “Әллүки” кунакка чакыра” дигән язу кабынды. Кечкенә артистлар күптән әзер, остазла­рының чакыруын гына көтә. 300 урынлы тамаша залында алма төшәр җир дә юк. Район хакимияте, мәгариф идарәсе вәкилләре, мәктәпләр җитәкче­ләре, укытучылар, күпсанлы укучылар килгән иде. Һәм менә барысының да игътибарын сәхнәгә юнәлтүне сорап кыңгырау шалтырый. Гадәти кыңгырау түгел, ә “Туган тел” җыры аккордлары яңгы­рый. Тынлыкка чумган сәхнә белән тамаша залын бербөтен итеп, ерактан моң ишетелә, якынайган саен ул көчәя бара. Гасырлар төп­келеннән килгән бу моң – халкыбызның “Әл­лүки” җыры. Аны Кандра музыка мәктәбе укытучысы Алия Закирова башкарды. Республика балалар журна­лының исеме шуннан алынган. Илаһи моң әсир­легендә утырган тамашачыларга алып баручылар – Туймазы шәһәре 1нче интернат-мәк­тәбенең 9нчы сыйныф укучылары Зарина Шәвә­лиева белән Динар Әхмәт­галиев шуны аңлата. “Әллүки” журналы хезмәткәр­ләренең кайнар сәламе кечкенә дусларына “Зәңгәр күл” җыры аша барып иреште. Аны Балалар-үсмерләр иҗат сараенда Башкортстанның атказанган мәдәният хезмәткәре Альбина Имаева сту­диясендә шөгыль­ләнү­челәр башкарды. Җитәк­чесе – Луиза Суфиянова. Җырны Альбина Има­ева Гөлфия Юнысова сүзләренә иҗат иткән. Алга китеп шуны әйтергә кирәк, Иҗат сараенда вокал белән шөгыльләнүче күп кенә малайлар һәм кызлар композиторның җырларын башкара.