Барлык яңалыклар

Уйнады гармун, җырлады

“Бердәмлек” фестивале бай тарихлы Бәләбәй шәһәрендә башланды.Сергей Аксаков, Марина Цветаева, Яков Ухсай, Константин Иванов — киң билгеле бу исемнәр барысы да 225 ел тарихлы Бәләбәй белән бәйле. Бәләбәй — 60тан артык милләтне сыендырган, искиткеч зур мәдәни байлыкка ия шәһәр. Милли мәдәниятләрнең “Бердәмлек” халыкара фестиваленең бу төбәктән башланып китүе шуңа да бәйле.

Чара “Надеждино” Аксаков тарихи-мәдәни үзәгеннән старт алды. Биредә фестиваль кунаклары тарих белән йөзгә-йөз очрашты — үзәктә аларны дворяннар каршы алды. Арытаба бәйрәмдә катнашу­чылар билгеләнгән маршрут буенча сәфәр кылды: Аксаковлар ыруының тарихы, шәҗәрәсе белән танышты, Кәсепләр һәм Бал йортларында булды. Һәр җирдә урыс җырлары һәм такмаклары яңгырап торды. Урыс халык уен кораллары оркестры төрле көйләр яңгыратты, балалайка, думбыра, гармун, калаклар күңелле моңнар тудырды. Кунаклар уеннарда катнашты, урыс милли ризыклары белән сыйланды.
Кич Мәдәният сарае алдында фести­валь рәсми рәвештә ачылды. Бәйрәмдә кат­нашучыларны Дәүләт думасының Мәдәният буенча комитеты рәисе урынбасары, Башкортстан халыклары ассамблеясе Советы рәисе Зөһрә Рәхмәтуллина, мәдәният министры урынбасары Рәнис Алтынбаев, Бәләбәй районы хакимияте башлыгы Юрий Мурмилов тәбрикләделәр.
Рәнис Рәис улы республика Башлыгы Рөстәм Хәмитовның сәламләү сүзләрен җиткерде, Бразилия, Көньяк Африка Республикасы, Кытай, Һиндстан, Кыргызстан, Казахстан, Үзбәкстан, Таҗикстаннан килгән башкаручылар һәм иҗат коллективларын Башкортстанда күрүгә шат булуын билгеләде.
Күркәм концерт төрле милли мәдәниятләр, гореф-гадәтләр, кәсепләр белән таныштырды.
Кичә исә бәйрәм чаралары Октябрьский шәһәрендә дәвам итте. Бу хакта тулырак мәгълүмат гәзитнең киләсе саннарында булачак.
Читайте нас в