-14 °С
Болытлы
Гәзиткә язылуVKOKTelegramЯRus
Барлык яңалыклар

Моңлы курай җыйды дусларын

Быелгы бәйгедә “Бердәмлек” халыкара милли мәдәниятләр фестивале кунаклары да катнашты.4-5 июньдә Нарыштау итәген төяк иткән гүзәл Октябрьский шәһәрендә “Бердәмлек” халыкара милли мәдәниятләр фестивале чикләрендә Курай бәйрәме үтте. Конкурс, башкорт халкының горурлыгы, милли символы саналган курайга мәдхия җырлау белән бергә, дөньяның төрле илләрендә яшәгән халыкларның дуслыгын чагылдыручы күркәм чарага әверелде.

— Республикада үткәрелгән иҗади бәйгеләр арасында Октябрьскийдагы Курай бәйрәме аерым урын алып тора, — диде жюри рәисе, данлыклы курайчы, Башкортстанның атказанган мәдәният хезмәткәре Мөхәммәт Түлебаев. — Бу төбәктә мәдәниятле халык яши. Аларның кунакчыллыгы безнең курайчыларга да илһам өсти. Шуңа бу фестивальнең офыклары киңәя бара. Быел ул Октябрьскийда унбишенче тапкыр үткәрелә. Шушы дәвердә бәйгедә 4000нән артык музыкант катнашкан. Бу бик тә мөһим, чөнки һөнәри сәнгатебезне туендырган илһам чишмәләре халык иҗатыннан юл ала. Мин үзем монда унынчы тапкыр киләм. 2005 елда Гран-прига лаек булган идем. Әйтергә кирәк, шундый конкурслар халыкның рухын күтәрү белән бергә, яшь талантларны табарга да ярдәм итә. Быелгы бәйге жюри әгъзаларында матур тәэссоратлар калдырды. Күп курайчылар яхшы әзерлек белән килгән. Яшь башкаручыларның борынгы музыка коралында сыздырып уйнавын тыңлау безнең өчен аеруча куанычлы булды.
Конкурста аерым баш­каручылар һәм курайчылар ансамбльләре сынау тотты. Абруйлы жюри составында Русиянең атказанган, Башкортстанның халык артисты, С. Юлаев исемендәге дәүләт премиясе лауреаты Азат Аеткулов, Русиянең атказанган мәдәният хезмәткәре, Баш­кортстанның халык артисты, С. Юлаев исемендәге дәүләт премиясе лауреаты Юлай Гайнетдинов, Башкортстан халык уен кораллары милли оркестрының сәнгать җитәкчесе, Русиянең атказанган, Башкортстанның халык артисты Рамил Гайзуллин, элекке елларда Курай бәйрәмендә Гран-при яулаган Әнвәр Шәфыйков, Рамил Котдусов, Нургали Каекбирдин һәм Венер Елкыбаев бар иде.
Читайте нас в