+22 °С
Болытлы
Гәзиткә язылуVKOKTelegram
Барлык яңалыклар
Мәдәният һәм сәнгать
11 август 2015, 21:31

Талантлылар да, булдыклылар да!

Илеш районы авыл хакимиятләре арасында оештырылган “Әдәби марафон” эстафетасы Иске Кыргыз мәдәният йортында бай программа белән билгеләнеп, Ябалакка юл алды.Мәдәният йортына 35 елдан артык инде Ринат Мәҗитов җитәкчелек итә. Барлык чараларның да сценарий авторы һәм алып баручысы — китапханәче Фәйрүзә Мәҗитова. Алар икесе дә Башкортстанның атказанган мәдәният хез­мәткәре. Әлбәттә, югары исем икеләтә җавап­лылык таләп итә. Менә шуңа күрә дә мә­дәният йорты коллективы һәр чараны җентек­ләп әзер­лән­еп, иҗади үт­кәрер­гә тырыша.

Әдәби марафон”ны да кыргызлылар югары дәрәҗәдә кабул итте. Чара барышында урыс, татар, башкорт классиклары да, Илеш җирендә туып-үскән — Суфиян Поварисов, Әхсән Баян, Роберт Миң­нуллин, Ринат Хәйри дә хөр­мәтләп телгә алынды, аларның шигырьләре яттан сөйләнде, җырлары башкарылды, әсәр­ләреннән өзекләр укылды.
Чара барышында Иске Аю авылында туып-үскән Хәсән Сарьян иҗатына аерым урын бирелде. Авыл мәдәният йортының драма түгәрәге әгъзалары — Рима һәм Илгиз Сәлимгәрәевлар, Зәлимә Мәҗитова, Эльмира Мәр­дәнова, Миләүшә һәм Айрат Мәҗитовлар “Бер ананың биш улы” әсәреннән өзек күрсәт­кәндә күпләрнең күзләре яшьләнде, залдан: “Чын артистлар кебек уйныйлар” сүзләре ишетелде. Шунысын аерым билгеләп үтәргә кирәк, март аенда Х. Сарьянның тууына 85 ел тулу уңаеннан Иске Кыргыз мәдәният йортында зур чара узган, якташ язучыга анда да тиешле кадер-хөрмәт күрсәтелгән иде. Бу юлы да Хәсән Сарьянга мәдәният йорты хезмәткәрләре һәм якташларының аерым игътибар бирүе күңелгә сары май булып ятты.
Чарага шушы төбәктә туып-үсеп, бүгенге көндә чит җирләрдә яшәп иҗат итүчеләр — Казаннан Зарима Хуҗи­әхмәтова (әдәби псевдонимы Мәликә Басыйр), Дүртөйле районы Суккул авылыннан Зәмфирә Шәехова да чакырылган иде. Уяндык авылында туып-үскән Зарима җырлады, шигырь­ләрен укыды, авылдашларына үзенең дискларын һәм китапларын бүләк итте. Краснояр авылы кызы Зәм­фирә туган авылына багышланган шигырьләрен укыды. Мин үзем исә Х. Сарьян турында истәлекләр җыюым, озакламый шуларны аерым бер җыентык итеп чыгарырга ниятләвем турында сөйләдем.
Ахырда сүз шушы тө­бәктә яшәүче иң яшь иҗатчыга — Груздевка авылыннан Илмира Имамовага бирелде. Ул шигырьләр яза, аларны үзе үк көйгә сала һәм гитарада уйнап башкара икән. Күптән түгел Зианчура районында узган “Кош юлы” дип аталган бард фестивалендә “Тамашачы сөюе” призына лаек булган. Әле дә ул яшьлек хисләре бөркелеп торган яңа шигырь­ләрен укыды, гитарада уйнап, үзе язган җырны да башкарды. Илмира, чын мәгъ­нәсендә, бу кичәнең ачышы булды.
Иске Кыргызда узган “Әдәби марафон”ны районның мәдәният йортлары хезмәт­кәрләре семинарында катнашучылар да карады.
— Чараны менә шушылай җентекләп әзерләнеп үт­кә­рергә кирәк, — диде аңа йомгак ясап, район мәдәният бүлеге җитәкчесе Раил Го­мәров.
Район хакимиятенең эшләр идарәчесе Салават Хәйдәров та кыргызлыларның эшенә югары бәя бирде, шушы тө­бәк­­тә туып-үскән талант иялә­ренә район хакимиятенең ис­тә­лекле бүләген дә тапшырды.
Арытаба Яңа Аю авылы хакимияте башлыгы Фәнил Нәҗметдинов “Әдәби марафон” эстафетасын Ябалак авылы хакимияте башлыгы Рөстәм Гыйлемхановка тапшырды.
Марафонга йомгак 9 ок­тябрьдә район мәдәният йортында ясалып, эстафета ут күршеләребезгә — бакалылыларга тапшырылачак.
Читайте нас: