-26 °С
Болытлы
Гәзиткә язылуVKOKTelegramЯRus
Барлык яңалыклар
Мәдәният һәм сәнгать
12 август 2015, 04:09

Камал театры Уфага җыена

10-17 сентябрьдә Мәҗит Гафури исемендәге Башкорт академия драма театры һәм Уфа “Нур” татар дәүләт театры сәхнәләрендә Галиәсгар Камал исемендәге Татар дәүләт академия театрының гастрольләре узачак.

Камал театры традиция буенча Башкортстан тамашачысына ике елга бер мәртәбә үз спектакльләрен тәкъдим итә. 110нчы иҗат мизге­лендә театр моңа кадәр Уфада уйналмаган 12 спектаклен алып килә.
Гастроль афишасында 4 премьера: Флорид Бүләков пьесасы буенча “Сөясеңме, сөймисеңме...” мелодрамасы; узган мизгелнең иң зур премьерасы “Хуҗа Насретдин” (Нәкый Исәнбәт, Саадалла Ваннус); Уильям Шекспир трагедиясе буенча куелган “Ричард III” фаҗигале уены һәм тамашачыларның иң яраткан ко­медияләренең берсе — Илгиз Зәйниевның “Мәхәббәт FM” әсәре.
Гастрольләр 10 сентябрьдә Башкорт дәүләт академия драма театры сәхнәсендә Норвегия драматургы Йон Фоссеның “Җәйнең бер көнендә” спектакле белән ачылачак. Бу спектакльнең фестиваль тарихы бик бай. 2012 елда ул “Алтын битлек” Милли театраль фестиваль-премиясенең дүрт номинациясендә катнашуга лаек булды. Афишада, шулай ук, Зөлфәт Хәкимнең “Искән җилләр көенә” романтик комедиясе, Туфан Миңнул­линның “Диләфрүз-Remake” музыкаль комедиясе, татар сәхнәсендә беренче спектакль-фэнтези — Илгиз Зәйниевның “Кечтүкле уен” әкияте һәм 108нче мизгел премьерасы — Г. Камалның “Банкрот” комедиясе.
Гастрольләр, әлбәттә, театрның “йөзек кашы” булган Кәрим Тин­чуринның “Зәңгәр шәл”еннән башка уза алмый. Инде ничәнче мәртәбә куелуына карамастан, спектакль үзенең популярлыгын югалтмый.
Читайте нас в