Тукайлылар җырлап яши!

– Авылыбыз клубына йозак эленгәч, йөрәк түзмәде, үзем клуб мөдире булырга теләк белдер­дем, – ди дүрт дистә елга якын гомерен башлангыч сыйныф укучыларына белем бирүгә багышлаган Фәнилә Гайсина. – Бу вакытта мин яңарак кына лаеклы ялга чыккан идем. Мәдәният учагы дөрләп тормагач, авылда ямь каламыни! Ул бит яшен-картын бер­ләштерүче, күңелләргә нур өс­тәүче урын.

Абруйлы укытучының телә­ген авылдашлары да, район хакимиятенең мәдәният бүлеге җитәкчелеге дә хуплый. Тынгысыз, төрле идеяләрне курыкмыйча тормышка ашыра белүче Фәнилә Тәбзил кызы­ның яңа вазыйфада, һич арттырусыз, икенче сулышы ачыла: Тукай клубы гөрләп эшләп китә, аның үзешчән артистлары районда үткәрелүче барлык мәдәни чараларда актив катнаша башлый, бер­сеннән-берсе матур җиңүләр яулый.

– Авылдашларыма чиксез рәхмәт­лемен: һәр башлангычымны дәррәү күтәреп алалар, ярдәм итәләр, – ди Фәнилә ханым. – Шуңа календарьдагы һәр истәлекле көнне мәдәният учагыбызда каршылыйбыз. Ел саен Шәҗәрә, Нәүруз бәйрәм­нәрен, Яңа ел кичәләрен, Халыкара хатын-кызлар, Ватанны саклаучылар көнен киң колач белән үткәрәбез. Авылыбыз кечкенә булса да, сабантуй оештырып, иген­че­лә­ребезне дә, ераклардан кайткан якташларыбызны да сөендерәбез. Моннан тыш, клубта гомерен намуслы хезмәттә үткәргән хөрмәтле авыл­дашлары­быз­ның юбилей кичә­ләрен оештырабыз.

Альбина Нәфыйкованы клуб мөдире үзенең алыштыргысыз ярдәмчесе ди. Альбина Кадим кызы өздереп бии дә, оста итеп сәхнә киемнәре дә тегә. Ә аның куллары белән үрелгән сувенир чабаталар, уенчыклар шундый нәфис, шундый күркәм – карап туярлык түгел!

– Гөлнара Гыйлемҗанова, Гүзәлия Маннапова, Римма Нуретдинова, Лариса Хәйрул­лина, Зөһрә Бәхтиева, Зөл­фирә Нәфыйковалар да барлык мәдәни чараларның уртасында кайный. Йортларын гөл итеп тотучы, репети­ция­ләрнең берсен дә калдырмаучы бу уңган хатын-кызларның һәркайсысына дан җырлар­лык, – ди Фәнилә ханым.

Тукай мәдәният йортында “Миләшләрем” вокаль ансамбле уңышлы эшли. Районда уздырылган “Өзелмәс моң” җыр бәйгесендә ул икенче урын яулаган.

Халкыбызның күркәм йолаларын, гореф-гадәтләрен тергезү юнәлешендә дә нәти­җәле эшли тукайлылар. Ихатасында 50шәр каз асраучы Фәнилә ханым бөтен авыл халкын җыеп, каз өмәсе үткәрергә дә, коллективы белән районда оештырылган “Халкым йолалары” бәйгесен­дә гран-при алырга да өлгерә. Татар халкының милли-мәдәни мирасын саклауга һәм үстерүгә куйган егәрле эшчәнлеге, бу өлкәдәге уңышлары өчен Фәнилә Гайсинага Башкортстан татарлары конгрессының Рәхмәт хаты да тапшырылган.

Мәдәният йортында зур булмаса да, авылның тарихы, данлыклы шә­хесләре хакында сөйләүче музей бар. Кунакларны авыл белән таныштыруны тукайлылар, гадәттә, шуннан башлый, горурлыкларын яшермичә, фидакарь эшчәнлеге өчен дәүләт бүләк­ләренә лаек булган авылдашлары турында бәян итә.

Тукайда мәдәният йорты буш торганы юк. Концерт, спектакльләргә дә, дискотекаларга да халык бик теләп килә. Илледә дә, җитмештә дә адәм баласының йөрәге яшь булып кала бит. Ә җыр-бию күңелгә дәрт, яшәргә көч өстәве күптән билгеле.