Данга тулы аты бар, җыр-моң сөяр халкы бар!

18 апрель кичендә “Нур”га килү­челәрнең күпләренә Аскын районы белән танышу, чын мәгъ­нәсендә, ачыш булды. Фойеда оештырылган күргәзмәдә Русиянең атказанган, Башкортстанның халык рәссамы Федор Кащеев сурәтләре, Рита Исламова, Гөлфия Сәгыйтова, Ида Арсланова картиналары, Ринат Ногманов җитәкчелек иткән урманчылык җитештергән агач җиһаз­лар каршы алды. Кашка авылында гомер киче­рүче 80 яшьлек Тәгълимә Дилмөхәм­мәтова, Әмир авылыннан Алия Корбанова суккан паласлар, Мәүзә апа Латыйпованың кул эшләре, Виктор Бычинның талдан, туздан ясаган әйберләре, Әнфис Ха­физовның иҗат җимешләре шулай ук таң калдырды, сокландырды.

Сәнгать мәктәбе, Балалар иҗат үзәге укучыларының кул эшләрендә балачакның якты нуры сакланган. Шунда ук Альфред Хаҗимуллин җитәкләгән икмәк пешерү цехы – күмәчләр, Риза Махиянов үзе җитештергән кәҗә кымызы белән сыйлады, район тарихын видеоязмаларга туплаган Айрат Усманов үз продукциясен күрсәтте, Аскын авылы биләмәсе, Реабилитация үзәге, Үзәк китапханә, Тарих – туган якны өйрәнү музее экспо­зицияләрен караучылар да күп булды. Татар, башкорт, урыс халыкларының дус-тату яшәве, кырыс табигать шартларында да югалып калмаган авыл эшчәннәренең уңган­лыгы – барысы да чагылыш тапты күргәзмәдә.

Әйткәндәй, кайберәү­ләр “Кызыл таң” нәшрияты оештырган һәм үткәргән чараларга саф экологик шартларда җитештерелгән продукция алырга махсус йөри икән. Һәм дөрес тә эшли алар! Баш­каланың кибет киш­тәләренә килеп урнашканчы урау юллар үткәненә караганда, районнан турыдан-туры килгән ризыкларны сатып алу барлык яклап та отышлы.

Шулай да тамашачыларның күбесе рухи азыкка сусап килгән. Туган якларын сагынучы якташлар, төбәкнең кияү-киленнәре, бу яклар белән кызыксынучылар, данлыклы шәхесләрен ихтирам итүчеләр белән гөрләп торды театр.