-8 °С
Болытлы
Гәзиткә язылуVKOKTelegramЯRus
Барлык яңалыклар

Бию һәм дуслык бәйрәме

Ата-бабаларыбызның йөрәк аһәңе булып туган халык җырлары уйсызларны уйлар дәрьясына чумдырып, моңсызларны моңландыра алса, милли биюләребез “колагына аю баскан”нарны да дәртләндереп җибәрү куәтенә ия. “Баек” бию телевизион конкурсы сәнгатьнең бу төренә, һичшиксез, яңа сулыш өрде. Кыю проектлары белән халык арасында танылу яулаган билгеле журналист Рита Өметбаева башлангычы белән юл алган чара күпме талантка зур сәхнәгә юл ачты, хәзер төгәл генә әйтү мөмкин дә түгел...

Башкорт илен җил-давылдан саклар калкан булып баскан мәгърүр кыялары белән күпләрне таң калдырган Морадым тарлавыгы сигезенче ел рәттән “Баек” балалар бию телевизион конкурсы җиңүче­ләрен үз кочагына җыйды. Кунакчыл Күгәрчен җиренә бу юлы да республикабызның төрле район-шәһәрләреннән тыш, Төньяк Осетия, күрше Татарстан, Чиләбе өлкәсен­нән килгән кунаклар аяк басты.

Чарада шулай ук район хакимияте башлыгы Фәрит Мусин, Башкортстан Хөкү­мәте Премьер-министры урынбасары Ирек Мөхәм­мәтдинов, Федераль суд приставлары хезмәтенең Башкортстан буенча идарәсе җитәкчесе Зариф Байгускаров, мәдәниәт министры урынбасары Ранис Алтынбаев, Дәүләт җыелышы – Корылтай депутатлары Ринат Нагаев, Хәләф Ишморатов катнашты. Олы кунаклар авыл биләмәләре, мәгариф учреждениеләре әзерләгән Кино елына багышланган күргәзмәләр белән танышты.

— Бию сәнгатенә булган сөю сезне зур уңышларга алып килсен. Бу көннәр бала чакның чагу вакыйгасы булып хәтерегездә мәңгелеккә калыр, дип ышанам, — диде катнашучыларга мөрәҗәгать итеп Фәрит Морзагилде улы.

Ирек Рәдил улы республика Башлыгы Рөстәм Хәмитовның котлау хатын укып ишеттерде, үзенең иң изге теләкләрен җиткерде.

Җиде ыру варислары җыелды

Бәйгене оештыручылар ел да яңа тема уйлап таба, әмма төп юнәлештән чит­ләшми — халкыбызның милли асылын сызык өстенә ала. Гала-концертның режиссеры Фәнил Әсәдуллин, куючы хореограф Рөстәм Хәйруллин, сценарий һәм җыр текстлары авторы Асия Гайнуллина, музыкаль яктан бизәүче һәм җырларның авторы, композитор Илшат Яхин да нәкъ шуны күз уңында тоткан.

Халык акылын үзенә туплаган Агәби (Алтынай Хамматова-Юнысова) җиде малайга токым җебе уралган йомгакларны тоттырып, җиде юлга озата. Һәр тарафта “Баек”ка чакырып, оран яңгырый...

Милләт асылы – биюләрдә

Һай, бай да соң халкыбыз биюләргә! Бер-бер артлы сәхнәгә күтәрелгән ыру вәкилләре нинди генә бию башкармады! Шунысы куанычлы, конкурсантлар “Язгы сәхрә”, “Җиләкле җәйләр”, “Күгәрченнәр”, “Чая кызлар”, “Ахирәтләр”, “Җаек буенда”, “Урманда” кебек биюләр белән беррәттән, дөнья сәхнәләрендә башкортны башкорт дип таныткан легендар “Озын чәч”, “Зарифа”, “Тыпырдык”, “Җиз үкчә”, “Рекрут”, “Бишбармак”ны да сайлаган. Кемдер бөркет булып очты, атлар булып чапты, кемдер чыбыркы шартлатты, сунарга чыкты, кызлар күз­ләде, кичке уенны гөрләтте, ук-җәя күтәреп илен саклады, кылыч белән алышты, самавыр кайнат­ты... — образлар төрле­легеннән күзләр камашты.

Ерак араларны якынайтып Төньяк Осетия-Алания башкаласы Владикавказдан килеп җиткән “Барс” халык ансамбле (җитәкчесе – А. Бахутов), Татарстаннан килгән “Очарование” хореографик коллективы (җитәк­чесе Г. Зиннәтуллина), Чи­ләбе өлкәсеннән килгән “Уралым” милли – мәдәни коллективы (җитәкчесе – В. Ягафәрова) чыгышлары да ямь өстенә ямь өстәде.

Бию кодрәте чиксез, шуңадыр да тамашачылар биючеләрдән күз дә алмый утырды, хәтта өстән җиңелчә сибәләп үткән яңгыр да аларны ышыкка качарга мәҗбүр итә алмады.

Иң дулкынландыргыч мәл

Алып баручылар әйтүен­чә, балалар бәйгесендә 3 яшьтән 15 яшькәчә мең дә өч йөз бала катнашкан. Бу сан аз түгел, шуңа да халык артисты, бию аксакалы Радмир Бәдретдинов, атказанган артистлар Фәнил Әсәдуллин һәм Рөстәм Хәйруллин, Учалы сәнгать һәм мәдәният колледжы укытучысы Гөлназ Гайсарова, проект авторы, Башкортстанның атказанган матбугат һәм киңкүләм мәгълүмат хезмәткәре Рита Өметбаевадан торган жюрига иң-иңнәрне сайлап алу бик авыр булгандыр.

Урыннар 3 яшьтән 10 яшь­кәчә, 10 яшьтән 15 яшь­кәчә ялгыз башкаручы малай һәм кызлар, парлы биючеләр һәм ансамбльләр арасында аерым билге­ләнде.

Һәр бәйгенең иң югары ноктасы — абсолют җиңү­челәрне билгеләү. Менә алар “Баек — 2016” балалар бию конкурсының Гран-при ху­җалары — Карина Гайфуллина һәм Алия Мөхет­динова (Әбҗәлил районы), Алия Хөснетдинова (Стәр­летамак шәһәре), Байрас Харисов (Баймак районы), Гөлназ Дәүләтбаева белән Эльвина Колманова (Гафури районы), Айсылу Янсурина белән Вәсилә Мәүлитова (Зианчура районы), 54нче балалар бакчасы бию коллективы (Салават шәһәре), “Грация” (Күгәрчен районы), “Шатлыҡ” (Әбҗәлил районы) өлгеле балалар бию ансамбльләре.

Җиңүчеләрнең барысына да кыйммәтле бүләкләр, сертификат һәм диплом тапшырылды. Әйткәндәй, ел саен бәйгедә иң әйбәт бию куючы хореограф, җитәкче бил­геләп үтелә. Бу исем­леккә кергән Җәмил Янбәков, Яна Чиглинцева, Айбулат Әһлиев янә бик күп балаларны зур сәхнәгә алып чыгачак әле!
Читайте нас в