Барлык яңалыклар
Мәдәният һәм сәнгать
13 август 2016, 02:00

Гөрләп торды Нева буйлары

Ленинград өлкәсендә үткән сабантуйда Башкортстан вәкилләре дә катнашты.Төньяк башкала һәм өлкә ярдәме белән Санкт-Петербург Татар милли-мәдәни автономиясе оештырган бәйрәмдә республиканың бай рухи мәдәнияте һәм икътисады белән таныштыру Октябрьский шәһәренә һәм Туймазы районына ышанып тапшырылды.

Ачык һавада урнашкан этнофольклор авылында халкы­бызның көнкүреше, мәдәнияте чагылдырылды. Туймазы артистлары кече сәхнәдә туган җиргә мәхәббәт турындагы җырлардан, башкорт биюлә­рен­нән, курайчылар ансамбле чыгышларыннан торган концерт программасы күрсәтте. Октябрьский шәһәре милли ашлар күргәзмә-дегустациясен оештырды. Ә зур сәхнәдә Стәрлетамак дәүләт театр-концерт берләшмәсенең бию театры, М. Кәрим исемен­дәге Милли яшьләр театры артистлары тәкъдим иткән концерт беркемне дә битараф калдырмады. Бәйрәм кунаклары башкорт көйләренә биеп, кушылып җырлады.

Русиянең Дәүләт думасы Рәисе Сергей Нарышкин, Ленинград өлкәсе мэры Александр Дрозденко, Санкт-Петербург шәһәре вице-мэры Александр Говорунов, Баш­кортстанның Русия Президенты каршындагы Тулы хокуклы вәкиле, Хөкүмәт Премьер-министры урынбасары Артур Шәйнуров безнең тир­мәләрне карады.

Батырлар милли көрәштә бил алышты, йола уеннары һәм бәйгеләр үткә­релде, кунаклар татар-башкорт милли ризыкларыннан авыз итте. Декоратив-гамәли сәнгать ярмин­кәсе оештырылды. “САВА” ит комбинаты, башка предприя­тиеләр продукциясе дә кунакларның игътибарын җәлеп итте.

Сергей Нарышкин Русиядә яшәүче халыклар арасындагы дуслык һәм татулыкның ышанычлы терәк һәм кыйммәтле казаныш булуын сызык өстенә алды.
Читайте нас в