“Йолдызлы юл” яңа киңлекләргә чыга

Фестиваль-конкурсның абруе елдан-ел арта, катнашучылар сафы тулылана, географиясе киңәя. Моны агымдагы елда үткән чираттагы чара да раслады. Анда катнашырга 39 театраль коллектив теләк белдерсә, мәдә­ни бәйгенең финал өлешенә 21 иҗади төркем чыкты. 27-28 мартта шә­һәрнең Балалар һәм үсмерләр иҗаты сараенда сәхнә осталыгында Аскын, Ярмәкәй, Тәтешле һәм Чакмагыш районнарыннан, Бәләбәй, Благовещен, Кү-мертау, Нефтекама, Октябрьский, Сибай, Стәрле­тамак, Туймазы һәм Татарстанның Баулы шәһәрләре вәкилләре көч сынашты. Коллек­тив­ларның чыгышларын һөнәри яктан Мәга­риф министрлыгы, респуб­ликаның әйдәүче театрлары белгеч­ләреннән торган абруйлы жюри, янә дә яшь артистларның тиңдәш­лә­ре бәһаләде.
Конкурска коллективлар репертуары гаять бай һәм төрле постановкалар тәкъдим итте. Курчак, мода театрлары чыгышларын классик тамашалар һәм спектакльләр алыштырды. Бер сүз белән әйткәндә, фестиваль сәхнәсе респуб­ликаның барча мәдәни төсмерләре белән балкыды. Конкурсның ике көне бер мизгелдәй үтте дә китте.
Фестивальнең тәүге өле­шенә “Карнавал тәгәр­мәче” дигән символик атама бирел­гән иде. Иҗади бәйгенең икен­че көне азагына бу “тә­гәрмәч” мактау пьедесталына җиңүче коллективларны чыгарды. Туган якларына Александр Тарасов (Күмер­тау), Вероника Славченко (Стәрле­тамак), Вадим Салихов (Нефтекама), Диана Ногманова һәм Валерий Шабарин (Октябрьский), Аделина Вәли­шина (Аскын районы) җиңү­челәр булып кайттылар. Иң яхшы режиссура өчен Эльза Хөс­нет­динова һәм Данил Малов (Нефтекама), Елена Наянзина (Октябрьский) бил­геләнделәр. “Педагогик осталык” Мактау грамотасына Илнара Мөхәммәт­нурова (Тә­тешле) һәм Иван Пикалов (Күмертау) лаек булдылар.
Республика фестиваль-конкурсының җиңүче коллективларына килгәндә, өченче урын Благовещен шәһәренең “Орленок” үсмер­ләр клубына (җитәк­чесе — Вероника Кәри­мова) бирелде. Икенче урынга Стәрлетамакның “Овация” театр студиясе (Динара Ильина) лаек булды. Беренче урын – Нефтекаманың “Виват” үрнәкле театр сту­дия­сендә (Эльза Хөс­нетдинова һәм Данил Малов). Фестиваль-кон­курсның иң дәрәҗәле Гран-при бүләге хаклы рә­вештә Октябрьский шәһә­ре­нең “Щелкунчик” үрнәкле театр студиясе (Елена Наянзина) коллективына тапшырылды. Конкурсның балалар жюрие тарафыннан фести­валь­нең иң яхшы театр коллективы итеп Баулы шәһә­ренең “Озын тәнәфес” төрке­ме танылды.
Республика балалар театр сәнгате бәйрәмен югары дәрәҗәдә үткәрүгә киң күңел­ле хуҗалар – Октябрьский Балалар һәм үсмерләр иҗат сарае коллективы зур өлеш кертте. Фестивальдә катнашучылар алдында чыгыш ясап, “Стелс” (вокал), “Инфинит” (хореография), “Какаду” (цирк), “Щелкунчик” театр студияләре бәйрәмне бизәде.